Yerba seco ta cuminda pa candela. A keda constata cu ultimo dianan sea intencionalmente of accidentalmente tin diferente candela ta cuminsa. Polis tambe sa haya yamada di hendenan cu ta mira con candela ta wordo cendi.
Mescos bomberonan tambe ta haya yamada. Den casonan di candela di yerba semper e ta un peliger. Hopi biaha e candela ta rond di un of otro cas y ta bira peliger pa e cas. Ademas e huma tambe ta un problema serio pa henter e area leu pabou di e candela. Diabierna anochi e polisnan di Santa Cruz a topa cu un candela basta grandi den e area cerca di Huchada. A pidi presencia di bombero.
E candela tabata di yerba y tabata cubri un area basta grandi. E huma tabata pasa riba e caminda. Polisnan a keda warda pa yegada di Bombero. E trafico tabata pasa cu masha cautela pasobra e visibilidad no tabata asina cla. No tabata tin daño grandi. Solamente susto y molester di huma.
