Diaranson 8 di september 2021 a cumpli 91 aña cu Camara di Comercio y Industria Aruba (KvK) oficialmente a establece su mes como e cuerpo representativo di Aruba su comunidad empresarial.
Aña pasa KvK a alcansa e gran ‘milestone’ di 90 aña di existencia, cu lastimamente pa motibo di nos situacion actual mundial no por a wordo celebra. Sinembargo, nos no kier laga esaki pasa sin haya su debido atencion y conmemoracion. P’esey awe nos tin un ‘double celebration’ di 90+1 years, unda nos ta recorda cu aña pasa, 8 di september 2020, KvK a cumpli 90 aña di existencia y awe, 8 di september 2021, a cumpli un aña mas. Como parti di celebracion a crea un esfera decorativo den e area di recepcion na KvK y tambe a treat cupcake na tur cliente cu a bishita oficina di KvK riba e dia aki.
Den transcurso di e añanan KvK su tareanan y representacion di comercio sigur a desaroya y crece unda cu ademas di su funcion pa cumpli cu e ley di establecimento di negoshi na Aruba, ta fungi cada dia mas como un fuente valioso di guia y sosten pa e empresario riba varios aspecto. Contando cu experticio y dedicacion di un ekipo dinamico cu ta consisti tanto di e hunta di directiva como tambe e empleadonan di e organisacion, KvK ta sigui percura pa cumpli cu su metanan y vision proponi.
Comercio mundialmente ta enfrentando situacionnan cu hopi reto y e impacto di e pandemia ta uno grandi pa nos companianan local tambe. A pesar di esaki KvK su proposito pa futuro cercano ta pa mantene e positivismo y union entre partnernan principal den comercio y hunto continua den un direccion pa innovacion y mehoracion continuo di nos clima empresarial.
Cu e dia festivo aki pa Camara di Comercio nos kier felicita tambe cada un di nos empresarionan y sector comercial completo cu tur dia ta contribui na economia di pais Aruba!
