Camara di Comercio: Gobierno tin cu dicidi riba BBO prome cu dia 1 di Juli proximo

Camara di Comercio tabata tin un reunion cu Camara di Comercio hunto cu vice prome minister Otmar Oduber.

Segun presidente di e entidad, Kawish Misier, nan a wordo yama pa un reunion cu minsiter di infrastructura y tambe minister di husticia tabata tey presente.

A invita Camara di Comercio a base di e conferencia di prensa cu a haci siman pasa diabierna y a splica nan nan preocupacionnan kico ta e motibonan pakico a insisti cu BBO mester keda riba e recibo.

Nan a scucha y compronde awo tiki mas miho kico ta e varios motibonan y a priminti cu nan lo bay bek den ministerraad y tuma un decision pa asina toch cumpli cu e preocupacionnan cu e comerciantenan tin.

 

Un reunion peculiar

E ministernan ya menciona, no ta envolvi den finansas. Misier a splica cu esun encarga ta e minister di finansas. Pero a sinta cu minister di infrastructura, den e caso aki vice prome minister. Pero Camara a papia caba si cu prome minister y a schuif full e asunto pa e minister di finansas. E ta esun encarga. Pero esey no kiermen cu no ta bay nenga un invitacion di cualkier otro minister. Portanan di Camara di Comercio semper ta habri. Nan ta acepta cualkier invitacion di cualkier minister y parlamentario. Y mas minister cu kier sa di e situacion, ta ok pa Camara di Comercio y lo logra e mayoria den ministerraad. Y di nan banda nan ta haci nan best di representa e comerciantenan y e asunto di BBO pa e keda riba recibo.

 

Oido

E punto cu a trece dilanti, ta completamente inpractico. No por cambia prijsnan asina lihe. BBO di 6 porciento, ta un impuesto cu ta temporal y tin cu baha bek pa 3.5%. Si e ta bira 3.5%, 1.5%, 12.5%, kico e prijs ta, si e keda riba recibo, por cambi’e facil. Pero si cada seis luna tin cu cambia tur e miles di productonan cu tin, e ta bira impagabel. E no ta practico y  no por wanta e gastonan pa medidanan cu ta populista.

 

Preocupacion

Esaki ta un preocupacion di un grupo di shete stakeholder, cu ta inclui AHATA, Timeshare Association, Jewelers Association, SNBA, Aruba Gastronomic Association y tambe otronan.

 

Conclusion

Segun Misier, e conclusion ta cu awo nan ta compronde e preocupacionnan y nan lo bay bek den nan seno y pronto lo bin cu un solucion. E mester ta prome cu dia 1 di Juli, pasobra esey tin e deadline cu tin awor aki. Y si nan dicidi cu e BBO ta keda riba e recibo, nan ta keda contento cu esey y lo comparti esey cu prensa.

Pero si nan bisa cu e BBO tin cu wordo absorbi den e prijs, e ora tin cu papia cu e comerciantenan pa bin cu un government fee di 6% pasobra e no ta para den ley cu no mag.