Den e carta di evaluacion di College Aruba financieel toezicht (CAft) riba e Uitvoeringsrapportage di presupuesto 2022 (UR), ta elabora riba e gastonan di personal, si ta cumpliendo cu esaki. A expresa preocupacion cu aumento di “overtime” y tambe e echo cu AZV no a logra baha 60 miyon, manera indica door di Hulanda!
E gastonan di personal den e di tres UR ta referi cu esaki ta 321 miyon florin. Esaki ta den cuadro di e presupuesto adapta (BW). Pero asina mes cu CAft no por evita di expresa su preocupacion riba e post di overtime. Manera ta conoci, den 2022 a papia cu ta bay corta den e parti di overtime den e ultimo parti di 2022. Den e di tres UR di 2022 nan a constata cu e post di overtime a subi cu 1.4 miyon florin. CAft ta mira e riesgo cu e gastonan di personal lo ta bay ta mas halto di loke a presupuesta, cu consecuencia cu e norma pa gasto di personal lo surpasa e 426 miyon cu a palabra den protocol. “CAft ta enfatisa e importancia pa Aruba pone un top pa loke ta compensacion na overtime.”
E di tres UR ta mustra un inversion limita riba e post di goederen en diensten. Te cu e di tres kwartaal a inverti 137 miyon, cu ta 65% di e presupuesto adapta (64 porciento). Mirando e tendencia di ultimo añanan, lo resta 13 miyon den 2022. Mirando e tendencia den e periodo di 2015 pa 2019, CAft ta constata un patronchi di menos inversion di loke tabata planea den e post di goederen en diensten. CAft ta conseha Aruba pa tene cuenta cu e situacion aki den presupuesto 2023.
Un otro aspecto cu nan a señala ta cu AZV ta calcula un deficit di 0,4 miyon florin. CAft ta bisa tambe cu e tarea cu a duna Gobierno pa reduci 60 miyon florin den cuido den 2022, no a keda realisa completamente. E pronostico den e di dos UR, cu den 2022 lo por spaar 44 miyon florin, den e di tres UR e cifra aki a bira 41 miyon florin.
Tambe a tuma nota cu e reduccion di 5.5% den e presupuesto di cuido di esunnan cu ta ofrece e servicio aki no a wordo ehecuta den 2022. Door di esaki ta kere cu na final loke cu spaar den AZV ta 39 miyon florin. Door cu no a logra baha e gastonan manera palabra, e lo trece un deficit mas halto na AZV. E reduccion di 5.5% riba e presupuestonan di dunadonan di cuido ta encera a base anual un suma di 20 miyon florin. CAft a bisa cu pa logra baha e gastonan den AZV cu 60 miyon florin den 2023, ta sumamente crucial pa reduci e presupuesto di esunnan cu ta brinda cuido.
Si logra reduci 60 miyon florin den 2023, Aruba ta obliga, via di e decision tuma den Conseho di Minister di Reino, pa bini cu besparingnan adicional!!
Por ultimo ta menciona cu Aruba a presupuesta 24 miyon pa inversion. Te cu e di tres kwartaal a uza solamente 6 miyon florin. Nan ta bisa den e carta cu “CAft ta constata un patronchi no deseabel di “onderbesteding” den inversion y ta conseha Aruba pa adapta e presupuesto di tal forma cu e ta conecta mas na e capacidadnan di recursonan disponibel aki.”
