A bay cu basta placa for di dje, esaki ta locual e dama di placer a duna di conoce despues cu el a pasa den un disgusto y susto grandi na man di un homber cu a bin pa pidi su servicio pero na luga di esey a atrac’e.
Esaki a tuma luga den careda di 1:30 pm ora cu diferente unidad di San Nicolas como tambe team di K9 a cuminsa busca den e area di B v/d Veen Zeppenfeldstraat, den caya grandi, pa un homber cu a atraca un dama di placer den dicho caya.
Segun descripcion, e ta un persona relativamente hoben, estatura halto, color cla, bisti na short blanco y keds na pia. A sali na careda y bandona e sitio pero a laga ademas di su auto, tambe su ID atras, cu a kita cay. Polis a bin topa cu diferente pertenencia y asina tin nomber y informacion completo di e atracado aki.
Den cercania di e bar a bin topa cu e KIA Rio color bruin cu nan a duna di concoe cu ta e vehiculo cu e atracado a yega cu ne. Tambe nan a bisa cu e persona aki lo tabata mustra di ta fuertemente bou influencia di un of otro substancia. Polis a continua cu e buskeda y mientras cu nan tabata sondea e area a bin topa cu un otro persona sin bida den cura di un scol. Informacion di e caso aki lo ta den un otro articulo.
