Maneho di sushi riba nos isla a cuminsa bay for di man y ta e comunidad mes ta informa di e situacion alarmante tumando luga den nan bario. Acumulacion di sushi ta birando algo incontrolabel! E area di e casnan social/ casnan di pueblo na Bushiri a mira varios dump publico lanta cabes.
E constata e situacion cu propio wowo na momento cu a bay bishita y tira un bista den e bario. Tin di bisa cu e habitantenan, esunnan cu ta poco mas disciplina, a vocifera di hopi preocupa na momento cu a tuma nota cu algun bisiña den e area di Bushiri, cu a cuminsa crea dump ilegal den pleno bista publico.
No ta algo cu ta mucho scondi, e sushi tira ta den pleno caya rond di e bari di sushinan di e bario. Bari di sushi di Serlimar cu no ta carga mas ta bira un ‘mini dump’ ora cu realisa cu e desperdicio cu a tira no ta algo cu Serlimar lo piki pa bay cu ne.
Segun tin entendi, Serlimar ta atende unicamente cu sushi/desperdicio cu ta den e bakinan di sushi. Cualkier material cu ta poni parti pafo di e bari di sushi, no lo piki cu nan. Esaki ta conta pa corchon, cashi, cama, wasmashin, sofa, como tambe tur otro material cu a laga atras rond di e barinan aki.
Esaki ta e motibo cu awo e area di Bushiri practicamente ta birando un dump publico. Ta papia di shete pa ocho mini dump rond di e compleho di cas di Bushiri. Na cada skina ta topa cu un of mas bari di sushi cu desperdicio tira banda di e bari pero cu naturalmente no ta bay fit den e bari. Ta pensa cu gran parti tin di haber cu a opta pa tira e material aki eybou mes, en bes di transporta e sushedad aki na luga anuncia/ corespondiendo awo pa atende cu sushi.
Ta di lamenta di mira cu hende cu porta lo a renoba, drecha of muebla nan cas cu articulo nobo den temporada di fin di aña, a bay tira locual a bira bieu afo band’i caminda. Tambe tin di bisa cu mientrastanto Serlimar a pasa piki sushi caba y tur locual cu no tabata den bari a keda mes un caminda, esta tira eybou den pleno bista publico.
Un instancia lo tin di bay haci e limpiesa aki pero tin di bisa cu e bisiñanan no ta nada contento mirando cu sushedad a cuminsa podera di nan bario. Ta cana rond y topa cu shete pa ocho dump chikito rond di e barinan di Serlimar.
Aña a bolter, siman nobo ta habri y keto bay ta sigui mira e problematica ta crece meymey di area habita entre e casnan di pueblo na Bushiri. Ta na su luga pa FCCA, cu ta esun encarga cu e casnan aki, tuma accion y haci e limpiesa necesario prome cu otronan tuma ehempel y cuminsa tira sushi rond publicamente pa haci e problematica aki bira aun mas grandi.
