Diabierna anochi, un tiki promer cu 12’or bati, varios unidad di Polis a bay direccion Green Corridor riba e caminda di Sero Teishi direccion Drive-In pa nan asisti nan colega cu a para un auto riba e caminda ey.
Segun informe ricibi cu no ta confirma ainda, un rato prome lo tabata tin un caso di hincamento na Liñear Park y cu esnan sospecha di ta envolvi den e hincamento, a subi un auto blanco tipo Honda Accord y a move for di e sitio.
Ta ora e victima a cana kibra na hospital cu su herida, autoridadnan a bin haya sa di e suceso aki. A cuminsa un buskeda pa e Honda blanco y dado momento a topa cu e vehiculo.
Mirando e seriedad di e caso, esnan cu a encontra e auto a pidi pa mas refuerso. Mesora varios patruya a bay direccion Rotonde Seri Teishi riba caminda pa bay rotonde Drive-In, unda nan colega tabata tin e auto para banda di caminda. Den e auto mes tabata tin cuatro persona sinta, dos muhe y dos homber. A baha tur cuatro y a busca den e auto y den baul di e auto pa wak si por a logra encontra cualkier evidencia cu ta relata na e hincamento mas trempan.
Den tur e investigacion pa haya sa, si esnan den auto berdaderamente tabata envolvi den e hincamento, a tarda basta rato pa trata di confirma. No ta conoci pa nos con grave e situacion di e persona ta, cu a ricibi e hinca. Ni ta conoci si esnan den e auto cu Polis a para, tabata envolvi den e caso di hincamento.
