Diabierna mainta a habri y ya caba tin hende burachi coriendo rond causando destruccion na auto di hende.
Dilanti Marietje Printing na Noord a sosode un caso lamentabel pa doño di varios vehiculo na momento cu un chauffeur, sospecha di ta coriendo bou influencia, a baha caminda y pasa dal den e autonan staciona dilanti establecimento.
Nan haya susto di nan bida ora diripiente a tende un desordo formal pafo di e luga.
A sali na careda pa wak kico por a pasa y a resulta cu un chauffeur den un Nissan March shinisi (A-30093) cu tabata biniendo for di noord, a pasa e birada di Buccaneer, baha for di caminda y slip perde control y bay dal den tres di nan auto staciona ey dilanti.
Afortunadamente niun hende no a resulta herida pero tres auto a ricibi basta daño.
Polis a presenta na sitio rapidamente y a cuminsa investiga. A detene e chauffeur di e Nissan March shinishi y a transporte’e pa warda di polis. Segun testigonan na sitio, e chauffeur di e Nissan March tabata mustra hopi bebi.
Lamentabel pasobra gasto di reparacion awo ta grandi pa cada vehiculo di cual ta spera cu seguro lo cubra esaki.
