Diabierna Corte Supremo na Den Haag a trata e caso cu Pais Aruba y Pais Corsou a cuminsa contra e sentencia di nos Hof, cu a habri matrimonio na Aruba y na Corsou pa pareha di mesun sexo.
E dos gobiernonan a apela bisando cu Hof a sinta riba stoel di parlamento .
Bruce Ponson, Presidente di Fundacion Orguyo Aruba a cuminsa na bisa cu e derecho di matrimonio entre dos persona di mesun sexo ta un bataya of un lucha cu nan a cuminsa cu ne for di 2019. Y nan tabata consciente cu probablemente e lo termina toch den corte na Hulanda. E fundacion sigur a kere cu e lo dura mucho mas largo. El a bin lihe pero esey no ta kita e derecho igual mester bin.
Den Corte, por a sinti cu Land Aruba no a bin cu mucho argumento. Pero for di prome dia nan tabatin varios reunion cu e representantenan di Land Aruba. Na varios ocasion nan a ripiti cu discriminacion contra di e personanan di mesun sexo, no lo forma parti di cassatie. Y esey ta loke por a wak den corte. Nan a unicamente para ariba e punto di bista cu hues a sinta riba stoel di parlamento. Y esey ta loke nan a presenta.
Di otro banda, e abogadonan di e fundacion, entre otro abogadonan Tjon Kie Sie, Wever y Murray, pa nan servicio, cu ta haciendo pro-Deo, cu a enfatisa hopi cla cu na momento cu den constitucion ta para cla cu hues por control si e derechonan humano, ta cumpli cu ne. Y esey ta loke ta haciendo awo. Hues ta coregi loke Parlamento y e gobernantenan di Aruba no ta haci.
Un mensahe di Fundacion Orguyo cu a resona den corte ta cu e ta algo relaciona cu e derechonan humano. For di prome dia, Fundacion Orguyo a encamina e caminda legal, ya cu e ta un derecho humano, e derecho fundamental di un persona cu ta locual e fundacion ta para p’e y pa esaki tambe nan ta buscando nan derecho den corte.
HUMAN RIGHTS CARIBBEAN FOUNDATION
Janice Tjon Sien Kie di Human Rights Caribbean Foundation a cuminsa na bisa cu, mescos cu na Aruba, e resistencia politico contra matrimonio di mesun sexo ta grandi. Ta un lastima cu mester a tuma e trayecto aki pa proteha e nan derechonan humano fundamental.
Gobierno di Corsou y Aruba tin e poder pa permiti matrimonio entre dos persona di mesun sexo. Pero esaki no ta un prioridad pa niun di dos gobierno.
Mescos cu na Aruba, como fundacion nan ta Sali na vanguardia di e comunidad LGBTQ na Corsou. En corto, e mesun situacion cu na Aruba.
E dos damanan di Corsou, tin un relacion hopi largo cu otro, di mas cu 10 aña y ta tempo pa trece cambio den henter e situacion aki.
