Un accidente basta serio a tuma luga riba caminda di Brazil caminda un persona a resulta herida. E chauffeur tabata pega den e vehiculo pa basta rato mientras personal di brandweer tabata haci su maximo esfuerso pa liber’e for di e situacion cu e tabata aden.
Esaki a tuma luga aproximadamente 12:45pm, riba caminda di Brazil direccion SPO, entre un Toyota Vitz color shinishi y un BMW color shinishi, cu basta daño material despues di e impacto.
Na esitio por a compronde cu e Vitz a bay sali na e crusada pabou di SPO y e BMW a bin claba riba dje. Impacto tabata asina duro cu e porta di e Vitz a bay aden por completo.
Ambulance, polis y brandweer a presenta mesora na sitio. A cuminsa desvia trafico pa duna espacio na personal di brandweer pa ubica nan material y traha eficasmente, sin preocupa cu trafico riba caminda.
Despues di logra libera e victima, a transport’e rapidamente pa hospital pa tratamento medico. Na e sitio por a tuma nota tambe di cura basha abou, caminda e BMW a bay dal aden como tambe familiar di e chauffeur herida cu a presenta na e sitio. Algun rato di basta angusta pa nan, mirando tur locual mester a haci pa logra sac’e for di e auto.
