Un “bon” gobernacion ta traha segun un vision di loke kier logra den futuro y tambe lo percura pa sigui cu e maneho realistico y aproba pa Parlamento di e gobierno anterior. Mescos cu e gobierno anterior a keda demostra cu e gobierno actual no tin un vision y tambe ta ehecuta un maneho basa riba mentira y incumplimento.
Pa mas di 14 aña a goberna Aruba sin pia ni cabes, cu ta e motibo principal tambe pa pobresa a sigui aumenta riba nos Isla y cu nos a perde mas autonomia. Gobierno kier laga nos kere sinembargo cu e caminda nos dilanti lo bay ta briyante, ya cu e institutonan manera S&P, Fitch y hasta CAft ta elogia e recuperacion financiero. Pero dicon anto gobierno a laga sa di lo ehecuta un maneho unda lo “cremencha”, anto den e presupuesto pa yuda esunnan mas vulnerabel den nos sociedad?
Si Banco Central tin rason, mas di 50% di nos pueblo ta biba den un situacion financiero precario. Pues e cantidad di esunnan vulnerabel lo ta hopi. Y e “garnachi” cu gobierno kier ofrece na esunnan vulnerabel, no tin nada di haber cu e gobierno diripiente a haya un iluminacion celestial te pa tin tin misericordia di nos pueblo. E “garnachi” ta unicamente debi na e hecho cu e gobierno ta den su ultimo rosea y ya a cuminsa prepara pa e campaña electoral. No ta gobierno so ta den preparacion pa e siguiente cendiendo electoral. E partido nobo di e corupto Otmar Oduber tambe a cuminsa cu su campaña unda e ta sigui fomenta mentira. Ta obvio cu e maneho di e minister encarga cu medio ambiente ta desastroso, pero ta e mesun Otmar ta autor intelectual di e masacre cu a tuma luga den maneho di desperdicio. A nombra un director cu antecedentenan cuestionabel. A huur un edificio na Pos Chikito di un di su sponsor mayor di campaña. A cera un contract miyonario pa deshaci di e desperdicio na Ser’i Teishi sin cu ta cumpli cu condicionnan pa haci tal. A uza fondo pa atende cu e situacion di RWZI, contra conseho di e director di DOW y por ultimo a laga cumpra un insinerado por medio di “gesjoemel” cu te ainda no ta traha.
E comportacion actual di Otmar no ta nada straño. Loke si ta remarcabel ta e silencio di parti di gobierno y di oposicion. Pakico Otmar ta critica solamente un partner di e coalicion? Por ta pasobra e mescos cu henter pueblo ta identifica Raiz como un partido “chiripero” of pasobra no ta cumbini Otmar pa bay den debate cu e Prome Minister? Por algo sera!
Di otro banda oposicion ta kedando keto a pesar di ta na altura di tur e actonan coruptivo cometi pa Otmar. Aki tambe lo por pensa cu Otmar lo tin informacion delicado di e gobierno di AVP cu e tabata forma parti di dje, pero mas bien mester pensa cu tur critica riba e gobierno ta welcome pa e partidonan den oposicion cu ta carga e speransa di por wak e gobierno tuma su retiro?
Falta di vision tambe por constata ora den prensa ta ser menciona cu tin un escasez grandi di dokter di cas pa locual e lista di espera y tambe e calidad di cuido den “eerste lijn” ta core peliger. E ta pa ami incomprendibel pero vooral inaceptabel cu awor tin un escasez di dokter di cas. Durante mi encargo como Minister di Salubridad, mi a percura pa inicia un opleiding pa dokter di cas. Esaki no a sosode sin mas. Ya caba tabata premira cu e cantidad di habitante lo crece vooral esunnan di edad mas halto. Tambe tabata conoci cu mester a enfoca riba e cuido primario cerca dokter di cas pa evita aumento demasiado drastico di gasto di salubridad. A sosode cu e “opleiding” mescos cu a sosode cu Dump. Si a haci esaki un prioridad awe nos lo tin por lo menos 40 dokter di cas ARUBANO cla pa traha como tal.
E gobierno cu a sigui a deshaci di tur facilidad na dump y tambe a tuma pasonan directo pa desacredita e maneho riba tereno di salubridad. Kico ta e resultado? No ta gobierno ta esun cu lo sufri e consecuencia, pero e pueblo humilde. Awor na ImSan a nombra tres dokter di cas. Cuanto di esakinan a sigui e “opleiding” como dokter di cas na Aruba??
Ta spera cu, si nan NO ta yiu di tera, a mara nan na un tempo defini pa laga espacio pa nos propio hendenan ocupa e funcionnan aki den futuro!
