Recientemente a sali den medionan di comunicacion cu lo bay trece cambio den nos LTU! Esaki atrobe ta nada mas cu un ‘windowdressing’ den optima forma. Si lesa bon un biaha mas nos mester constata un hipocrecia di marca mayor di e gobierno aki. Dicon? Di un banda nos ta haya un minister encarga cu labor y DIMAS ta hibando un maneho cu por considera como un continuacion di e maneho cu tabatin caba desde fin di 2009. Esta maneho di un porta hancho habri y unda corupcion a bolbe haci su entrada despues cu fin di 2005 a caba cu tur esakinan. E maneho corupto aki no ta nada straño, pasobra esun cu tabata haci e trabou sushi pa e mandatario anterior, Sevinger, ta nada menos cu Mario Wever!!
Na diferente ocasion UPP a haci denuncia contra e corupcion y mal gobernacion di e mandatario aki y Wever. Atrobe TUR partido politico y instancianan a bira cara pa esaki y consecuencia di esaki ta cu e ARUBIANO no tabata conta mas. A flexibilisa e LTU pa acomoda esunnan cu a demonstra di NO ta un bon ciudadano! Matrimonio ficticio, ilegal ta haya permiso, firma liber ta ser haya ya despues di 3 aña. Cu esaki e Arubiano a bira ciudadano di segunda categoria. Ora cu na 2017 pueblo a kere cu lo bin un cambio, mester a constata cu cos a bira pio! E maneho a haya elemento acerca. A kita e kozijn di porta y bentana. Si despues di fin di 2009 e Arubiano tabata riba caminda grandi pa fierno, cu e maneho aki, e Arubiano a wordo poni riba e caminda di careda pa fierno!!
Esunnan cu a haci nan mes culpabel di tur e corupcionnan den DIMAS no a wordo persigui y na Labor a bin un maneho liberal na unda e.o. ilegal ta haya status di legal. Con por ta posibel cu nos economia ta na suela y e gobierno anti-Arubiano aki ta keda duna prioridad na TOELATING!! Dicon no ta duna ‘Job Center’ e luga cu e mester ocupa particularmente ora cu economia ta na suela? Dicon ta keda duna tur atencion na TOELATING?? Unda e proyecto ‘Ban traha’ a keda? Esaki no tin prioridad?
Pa pone e cherry riba e bolo di e tantisimo corupcion den dunamento di permiso a pone tanto e asunto di Labor y di Permisiologia den un solo man. Despues di 2017, e Minister Glenbert Croes a yena Departamento di Labor pata pata di su confidentenan cu ta haci tur nan esfuerso pa e Arubiano keda wordo perhudica!! Awor a promove e persona cu tabata haci e trabou sushi pa ex-minister Sevinger, como co-Director di Dimas. Cos no a caba aki. Pa por ehecuta nan maneho contra e ARUBIANO di un forma mas facil, a decreta di ta contra e sistema cu a ser introduci na 2006 na unda a firma e protocol cu a pone un fin den e tantisimo corupcion y excepcion den e otorgamento di permiso.
Algo INSOLITO y algo cu hamas por ser considera como INTEGRO! Con por ta posibel cu henter e gabinete y henter parlamento ta kedando keto? Of e siguiente eleccion ta mas importante cu nos siguiente generacion? Of lo bay na AMEN di COHO! E instituto neo-colonial aki a cuminsa pone presion pa flexibiliza henter e LTU pa laga Hulandes Europeo haya mas previlegio y laga 28.000 stranheronan mas nan famia (45.000) drenta nos pais? P’esey tambe e intencion di un ‘generaal pardon’ ta colgando atrobe den laira?
Tur esaki danki na gobiernonan super mediocre cu NO a sa di a cumpli cu loke nan mes a combini desde 2014? Y awor e tiger di papel, Tjon, cu nos a conoce den pasado caba cu na Aruba tin asina un boca grandi riba e.o. Caft, pero ora cu mester a para duro a para bira moli moli, kier bin hunga heroe atrobe cu un cambio den e LTU pa sanciona esunnan cu tin ilegal den servicio.
Colmo di hipocrecia. E LTU actual ta duna TUR autoridad na esnan encarga actua, pero mester tin e curashi pa actua. Unda Tjon tabata ora cu ilegalnan a wordo gara den compania y ordo a bin di riba pa laga esakinan bay? Por a duna multa administrativo riba nan, pero SCOGE pa no haci esey y a keda keto! Cambio den e ley di LTU lo NO cambia nada si NO tin ni e curashi ni e boluntad pa actua cu man duro! Dicon no a para duro, ora cu e ilegal cu Guarda nos Costa tabata kier a deporta, cu un sentencia den nan man, a wordo laga liber? Aki en bes di a para duro, a bira moli moli djis pa keda den e stul ey. Esaki ta INTEGRO? Raro cu for di parlamento no a tende casi nada. Dicon?
Pues si no bin un maneho estricto manera tabata tin despues di november 2005 pa november 2009, na unda a elimina tur corupcion y excepcion den otorgamento di permiso e tempo ey, e cambio aki no ta nada otro cu simpel ‘windowdressing’ pa sigui cu e maneho ANTI-ARUBIANO cu nos a conoce desde fin di 2009. Ban stop di play e guy fuerte papiando, pero ora cu mester actua cu man duro, ta para bira MOLI MOLI!! De facto e maneho liberal y flexibel di gobierno stranhero complaciente ta nifica cu e stranhero ta ser poni riba e ‘HIGHWAY2HEAVEN” y e ARUBIANO ta ser benta pa su cuenta riba e “SPEEDWAY 2 HELL!!
