Un scenario cu normalmente no sa sosode ya cu Aruba Airport Authority tin un plan alternativo pa suministro di coriente den caso di emergencia. Sin embargo, algo a bay robes y Aeropuerto Internacional Reina Beatrix a bay plata pa aproximadamente un ora. Maske no ta hopi tempo, e daño causa na e operacion toch a percura pa un caos cu lo tuma mas largo cu esey pa bay bek na normalidad.
E blackout a registra aproximadamente 10 minuut prome cu 2’or di atardi y pa 2:30 aeropuerto ta declara su mes oficialmente cera, dunando inicio na e plan di evacuacion di tur pasahero paden di e facilidad di manera structura.
A traves di tur plataforma di comunicacion na nan disposicion, AAA ta emiti un anuncia bisando: Aruba actualmente ta experenciando un perdida completo di electricidad (black-out). Aruba Airport tambe ta afecta pa e perdida di coriente y operacion di Airport ta para te proximo aviso. Nos ta haciendo nos maximo esfuerso pa sigura cu e impacto di e perdida di electricidad lo ta lo mas limita posibel. Danki pa compronde. Por fabor comparti cu biaheronan biahando di/pa aeropuerto di Aruba.
Pa 3:08 pm ta logra reestablece e suministro di coriente, sinembargo no ta stabiel ainda. Mirando e circunstancia, ta opta pa continua cu e proceso di evacuacion. Shete minuut despues, esta pa 3:15 pm, ta declara cu e pista ta habri, pero e edificio di aeropuerto ta continua cera.
Mientras tanto tin un cantidad di pasahero pafo di e edificio cu a yega pa tuma un vuelo y tin hopi dificultad pa haya informacion for di personal di aerolineanan of di AAA mes. Pa 3:21 pm e pista ta bek den funcionamento y ta reinicia poco poco e procesamento di pasaheronan.
Posteriormente Aruba Airport Authority ta informa tocante e status di vuelonan cu tabata na caminda pa Aruba durante e blackout. Un vuelo di Delta Airlines for di Atlanta a cancela pa aspectonan cu no ta relaciona cu e fayo di electricidad. Dos vuelo di Jet Blue a desvia pa Corsou y dos mas pa Santo Domingo, di JetBlue y United Airlines respectivamente.
Aunke AAA no haci un declaracion oficial ainda di e motibonan pakico e blackout aki si a afecta nan operacionnan, ta sospecha cu e por ta relacion cu e trabounan di construccion di e proyecta Gateway 3000 cu ta andando actualmente na e tereno di aeropuerto.
