Por pasa cu bo por bira malo tras di stuur, ta netamente locual a pasa un rato pasa. Tabata alrededor di 8:25 pm ora un auto marca Nissan modelo X-trail color shinishi, numera A-821 a accidenta contra un Kia Sportage color preto numera A-46595. E accidente a sosode riba Sasaki weg, un poco mas panort di rotonde Super Food.
E Nissan tabata biniendo for di Palm Beach direccion Playa y e Sportage for di Playa direccion Palm Beach. E chauffeur di e Nissan pa un motibo of otro a crusa otro band’i caminda y accidenta frontal contra e Sportage. Segun informacion compila na sitio, e chauffeur di e Nissan a bira malo tras di stuur. Ora polis a puntra e señora kico a pasa, el a keda sorprendi cu e ta envolvi den un desgracia, pues e no ta corda kico por a pasa.
Parce e señora ta sufri di curason y presion halto. Dos ambulance a presenta na sitio, pa brinda atencion medico n’e chauffeur di e Nissan y p’e chauffeur di e Kia, cu tabata keha di basta dolor na su pianan. Na final a transporta ambos pa hospital, caminda lo brindanan atencion medico avansa.
Polis a desvia trafico p’asina e specialista di trafico y ambulance atende cu e victimanan y e accidente mes. Daño material tabata basta, mas bien na parti dilanti di ambos auto. Mirando cu e autonan no por a move riba nan propio forsa, a pidi takelwagen pa busca y transporta e vehiculonan.
