Durante aña 2022, tur hungador di bingo cu a cumpra carchi di bingo a ricibi un ticket blanco pa por participa pa gana un Mitsubishi Xpander 2022. Lo conta cu un total di 15 participante cu lo ricibi un yabi durante di e evento pa asina purba habri e auto.
Den e ultimo simanan a saca 11 participante y ariba dia di evento lo saca e ultimo 4 participantenan. Nos ta pone enfasis cu tur participante y posibel participante mester t’ey presente na e evento pa e participacion por ta uno valido. Si encaso e persona no por ta presente, ta posibel e ora pa asigna un representante, pero e representante mester presenta cu un machtigingsbrief y un copia di I.D. di e persona cu su nomber a wordo inicialmente anuncia.
E evento aki lo tuma lugar diahuebs awo 15 di december 2022 den parkinglot di Frans Figaroa Sport Complex (Noord). Evento ta cuminsa 5:30 di atardi y lo termina 9:30 di anochi. Lo conta cu entretenimento special di Grupo di Betico y sin laga afo e banda ‘N Fusion.
Tur hende ta keda cordialmente invita pa presencia e momento cu lo conoce e ganador absoluto di e Mitsubishi Xpander 2022. Waw!
Bin aporta na e cushina di Colegio E.P.I. pa bo sabroso cuminda.
Durante di e evento aki lo tin oportunidad pa cumpra e grandioso “Give Back Bingo” cual lo tuma lugar dia 18 di december 2022.
Pa mas informacion di e evento por libremente tuma contacto na (+297) 6999914. Di curason, Bingo Aruba ta gradici tur hungador di bingo cu a sa di pasa momentonan inolvidabel durante tur Diadobingo den aña 2022. Nos ta sigui cu e bon ambiente den aña 2023.
