Manera anteriormente palabrá i primintí, Biblioteka Nashonal di Kòrsou i Komishon di Supervishon di Hustisia e kumpli ku nan promesa hasí na Tim di Maneho i e klientenan di SDKK.
Últimamente durante di e bishita di e dos órganonan aki na SDKK nan a tuma nota di e deseo fundamental ku e klientenan den SDKK tin, i ku nan ke hasi uso di dje, pa nan por sigui desaroyá nan mes pa medio di lesamentu di buki.
E echo ku tin un interes haltu bou di e poblashon di SDKK pa lesa bukinan na Papiamentu (Ingles i Spañó), e dos órganonan ya ariba menshoná a hasi nan máksimo esfuerso i a buska den nan seno di trabou, boluntario-, famia- i konosínan bukinan di eskritornan lokal.
Durante di e siman aki Biblioteka Nashonal di Kòrsou i Komishon di Supervishon di Hustisia a presentá na SDKK ku un kantidat di buki na e lenganan ya menshoná.
Ku esaki huntu por a hasi lo nesesario pa por kumpli ku e nesesidat i petishon positivo aki ku a sali for di e klientenan di SDKK. Ta importante i imperativo pa den un forma inkansabel sigui motivá i aktivá e proseso di pensa positivo, aktua positivo i siña di otro serka e klientenan riba tur tereno ku ta posibel. Ku esaki, di un banda, ta yuda trese e kambionan deseá den pensamentu i aktitut di e klientenan mes i alabes en esfera general di traha den e instituto den su totalidat tambe.
Ta importante pa mustra i informá pueblo di Kòrsou riba e esfuersonan ku diariamente ta wòrdu hasi pa hinka i mantené e klientenan den trayekto- i proyektonan positivo durante di nan detenshon.
