Nos coresponsal na Merca (Mark Benson Denz) algun siman pasa a informa nos usuarionan cu e trein entre Miami y Orlando lo bay cuminsa core. E reportahe a haya mas di 40 mil views, y awor cu e trein a cuminsa core, nos a dicidi di traha un ‘follow up story’ biahando ful e ruta pa Aruba por mira con e proceso ta bay.
Por menciona cu e demanda tabata hopi mas grandi cu e compania Brightline mes a pensa. Esaki a haci cu hopi lihe a subi e frecuencia entre Miami cu Orlando. Actualmente, por scoge entre mas cu 10 orario pa biaha sea for di Miami pa Orlando of vice versa.
E prijs ta varia dependiendo di unda bo aborda, por ehempel Miami, Aventura, Fort Lauderdale, Boca Raton of West Palm Beach. Tambe, con trempan bo cumpra bo ticket ta influencia e prijs. Pa e tour di Miami pa Orlando, esaki ta cuminsa na $59 pa persona. Pa loke ta e duracion di e biahe, esaki no ta varia mucho cu si bo lo core e ruta cu auto. Sin embargo, hopi persona no ta desea di core auto pa tanto ora. Tambe hopi persona di negoshi ta prefera di tuma e trein mirando cu nan por traha trankilamente durante e ruta. Cu esaki nan productividad ta rindi. Tin coriente y Wifi den tur trein. Tambe otronan ta prefera e trein door di no mester pasa den tur e medidanan di seguridad na aeropuerto.
E stacion di trein na Orlando ta situa riba e mesun tereno di e aeropuerto principal di Orlando (MCO). Esaki tin su bentaha mirando cu bo por conecta facilmente cu un buelo y of huur un auto na e aeropuerto mes. Actualmente e mesun compania aki ta trahando riba un ruta entre Las Vegas y Los Angeles.
Si bo tin un idea pa un storia/entrevista/noticia na Merca, por tuma contacto cu nos cu bo sugerencia via news24ora.com.
