Diahuebs mainta durante continuacion di tratamento di caso Avestruz den Corte di Prome Instancia, Benny Sevinger a mustra na hues con dia 5 di januari 2004 señora Gilda Yolanda Croes a pidi un tereno di 70 mil meter cuadra riba su nomber, como ama di cas, y el a haya tambe e opcion, mientras cu, como ama di cas, e no tin acceso na e suma di 65 mil florin cu tin mester pa desaroya un tereno asina. DIP no a haci un investigacion, ni tabatin formulario. Un aña mas laat, ta registra un peticion oficial na DIP.
Fiscal a puntra señor Mansur cu su compania a wordo lanta 3 luna prome cu a haci e peticion cual ta e logica, mientras cu señora Croes a haci opcion prome y un aña despues ta haci peticion oficial cu un compania cu el a registra un aña despues. Anto Ministerio Publico ta bisa cu esey no ta ilegal. Loke ta pone Sevinger puntra nan ta cu cuanto midi kier midi. Y ora a indica na hues cu siman pasa el a haya un carta bisando cu no ta ilegal, e hues su argumento ta cu e no a wak dicho carta pa cual Sevinger a ofrece di dun’e un copia.
Ora e defensa di Sevinger a pidi pa añadi e dossier y e carta aki, a nenga argumentando cu no ta bal la pena. Segun e politico, no ta bal la pena pa Ministerio Publico paso no kier yega na e cabes di e colebra cu ta Evelyn Wever-Croes.
Mientras cu PG van Dam a declara cu e ta hopi contento cu integridad ta importante pa gobierno y bisando cu “e Arubiano mester tin e siguransa cu ora e entrega un peticion e ta wordo trata mesun forma cu su bisiña kende kisas pa casualidad ta miembro di un partido politico,” di otro banda e ta sinta cu dos parlamentario pa entrega un denuncia contra Benny Sevinger y den tres luna a cuminsa investigacion.
Pero ora cu Benny Sevinger, kenta ta mesun parlamentario a entrega un denunca, despues di un aña y mey, PG ta bisa cu e no ta mira acto ilegal. E ora ey lubida kico van Dam a papia, pasobra echo ta cu e no ta aplica esey. Benny Sevinger ta wordo trata otro y echo ta cu partido AVP ta wordo trata otro; esey ta e realidad.
Djis pa e manera con e politico ta bringando contra fiscalia y exponiendo nan bias, hopi hende a comenta na Sevinger cu nan lo pidi e maximo cu nan por. “M’a bisa nan (oposicion): “boso kier caba cu Benny Sevinger, caba cu su carera politico, caba cu partido AVP uzando ministerio publico cu ta permiti pa wordo uza. Esey no ta kita cu mi tin derecho di bringa, derecho di mustra con nos husticia ta funciona aki na Aruba.”
Ningun momento a bin dilanti den e audiencia di diahuebs mainta cu un hende a duna Sevinger placa of tocante unc uenta di banco na Merca cu miyones. “As a matter of fact, e 2.5 miyon cu nan a bisa mi tin na Corsou; ora cu m’a drenta corte e tabata dimi y ora m’a Sali, ya e no ta di mi mas. Un rato mi tabata miyonario den mi mente y pa fiscalnan, pero despues nan mes a bisa hues: ‘tende e co’i ta van de bank nos no por prueba”, paso no ta berdad,” asina Sevinger a conta.
Pa e relato completo, lesa edicion di TREMPAN
