Costo di bida na Aruba ta halto y ta sigui subi, mientras cu e salario mes no ta mira un aumento. Den e ultimo temponan, por a scucha un parlamentario, Marco Berlis di partido MEP, cu ta boga pa un aumento di salario minimo.
Pero den seno di gremio comercial e pensamento ya cu esaki lo crea un spiral inflatorio, pa cual e Minister di Asuntonan Economico, Comunicacion y Desaroyo Sostenibel, mr. Geoffrey Wever a indica cu ora cu tuma un decision asina, mester tum’e despues cu a evalua tur e aspectonan cu ta relevante cu esey. Segun ley, prome cu aumenta salario minimo, cu mester tin un conseho di Sociaal Economisch Raad. A manda pidi esaki, ya cu tin un plan pa aumenta esaki, pero e conseho aki mester drenta pa tuma un decision bon balansa.
Segun e mandatario, den e doctrina di inflacion, si e gastonan como comerciante subi, y diripiente e comerciante ta hay’e confronta cu gastonan di labor mas halto, cual ta un di e gastonan di mas halto di e comerciantenan. Tur rapport ta indica cu e ‘Cost of doing business’, ta un di e factornan mas importante ta cu e ‘labor expenses’ ta hopi halto na Aruba. Si aumenta esaki, lo aumenta e gastonan operacional, e margen di ganashi ta bin na peliger. Den un caso asina, loke e comerciante ta haci ta di inclui esaki den e prijs. y ta den esaki ta wak e inflacion, manera el a menciona caba.
Esaki ta un situacion preocupante, cu ya caba Aruba ta importando tur e inflacion internacional, door di e desaroyonan riba tereno GEO politico, cu Aruba no tin influencia riba dje. P’esey mester ta hopi cauteloso ora cu ta tuma decision cu ta aumenta ainda mas e inflacion.
El a reitera cu pa tuma e decision aki, mester tin tur e debido consehonan na nan lugar, pa e ta un decision responsabel, e mandatario a finalisa bisando.
