Diaranson caso Avestruz, contra di Benny Sevinger, como ex-Minister di Infrastructura, unda cu ta acus’e di a firma pa otorga tereno contra pago, cual segun Ministerio Publico, ta core den miyones di florin. Un acusacion cu ex-Minister y actual Parlamentario, Benny Sevinger, ta desmenti for di e prome dia.
CASO DEN CORTE
Na su salida, nos colega Maritza Maduro a combersa cu Benny Sevinger riba su punto di bista di con e caso a cana. Pa Sevinger, henter e caso aki ta un persecucion politico y esaki el a purba splica hues. E ta den corte, no pasobra cu el a haci algo malo, pero ta su contricantenan politico a pone Ministerio Publico bou di presion pa investiga e supuesto miyones cu Sevinger lo a ricibi y lo a gasta.
Pa cinco aña caba, e caso aki ta andando, ta pasa den un trauma pa e defende su mes, hunto cu su famia. E ta sigur di lo sali liber ya cu e no a haci nada malo. Y esey el a bisa e fiscal di Ministerio Publico tambe den corte, cu nan no tin niun prueba contra dje. Den corte, Sevinger a pidi e fiscal pa mustr’e un telefon, un carta, un whatsapp, un email, unda c’un hende lo a ofrec’e placa of e lo a ofrece un hende placa, cual no ta existi. Tambe el a pidi pa mustr’e tur e cuentanan cu e lo tin na Corsou, Panama, etc. Sevinger a enfatisa cu henter e caso aki ta un persecucion politico. Pero, e ex-parlamentario a bisa e recherche cu MEP ta un meta comun e partido tin: cera Benny Sevinger, caba cu su carera politico y na mes momento, haci daño na partido AVP.
METEMENTO POLITICO
Tin demasiado metemento politico den Landsrecherche, cu na ultimo ta duna conseho na Ministerio Publico, Sevinger a sigui bisa. Esaki ta mina nos estado di derecho, e ta mina nos democracia. Si un partido tin presion riba husticia y uza esaki pa (purba) schakel uit e contricantenan politico. Sigur un movemento hopi peligroso pa cual e pueblo di Aruba mester ta atento riba esaki.
Pa Sevinger, partido MEP no por gan’e den un debate. Nan no por gan’e den un debate di con ta bay drecha e poder di compra pa e ciudadanonan. Con lo haci mas proyecto manera Watty Vos Boulevard, Green Corridor. E unico manera cu nan por elimin’e, kit’e for di caminda ta door di persiguie, yam’e pa corupto, aunke cu no tin niun prueba. Pero tanten cu nan tin e instancianan manera Ministerio Publico y Landsrecherche nan tras, esey ta machtsmisbruik.
CASO AVESTRUZ
Ministerio Publico a informa dia 2 di october 2019, dia cu a haci e entradanan hudicial, cu Landsrecherche hunto cu hues-comisario y den cooperacion cu Cuerpo Policial di Aruba, a tene entrada hudicial na diferente luga. E entradanan aki a tuma luga den cuadro di un investigacion penal di Landsrecherche pa posibel delitonan di corupcion y otro echonan castigabel posiblemente cometi relaciona cu otorgamento di terenonan di gobierno. Mas concretamente: E investigacion ta dirigi riba e pregunta si un of mas compania a obtene a base robes (un opcion riba) derechonan di erfpacht di terenonan di pais Aruba den e añanan 2009 te 2017. Ademas ta investiga e rol di ex- Minister Benny Sevinger den esaki.
