Tanto Benny Nisbet como Booshi Wever a haya un mensahe cla y raspa di e pueblo votado. Ni cu nan a cera cabes hunto, nan no a logra, alcontrario, a bay mas atras ainda den e abismo cu ya nan ta bibando aden e ultimo añanan.
Benny Nisbet a logra 150 voto den e eleccion aki, cu ta e record den MENOS voto den su carera politico. El a start di hopi aña pasa pero nos ta observa cu na aña 1997 e tabatin 968 voto, sigui na 2001 pa 931 voto, na 2005 a sigui baha pa 436 voto, na 2009 a cay na 329 voto, a purba na 2013 y a sigui baha na 245 voto mientras cu awor na 2017 e no a haya mas cu 150 voto di sosten.
Booshi Wever su storia no ta mucho miho. Den e eleccion di e aña aki el a logra 222 voto, aunke poco mas cu Benny Nisbet, toch e ta e record den MENOS voto cu el a logra den su carera largo den politica. For di tempo di MEP caba el a cuminsa bin abou pero den e ultimo eleccion, cu UPP el a logra unicamente 652 voto riba su nomber.
