Batata cu saus a bay halto diabierna anochi riba e caminda di Tanki Leendert. Chauffeur di un auto marca Toyota modelo Rav4 color shinishi, numera A-25817 a baha caminda riba e caminda di Solito pa Tanki Leendert y bay dal contra di por lo menos cinco auto para canto di caminda. E chauffeur a keda pega den mondi pero keto bay tabata reis motor pa sali bay. E personanan cu tabata sinta na e trucknan di pan den cercania a activa mesora y a kita yabi for di e chauffeur.
Den combersacion cu un di e doñonan di auto cu a ricibi daño, a conta cu; e tabata sinta den auto ta warda su ‘parilla de pollo’ ora cu el a tende un zonido duro y djey e Rav4 a dal contra su auto. Un otro chauffeur a conta cu e tabata comiendo su “salchi papa” cu su pareha den auto y debi na e impacto, cuminda a spart tur den auto.
Polis a presenta p’asina documenta e accidente aki. E chauffeur casi no por a para riba su pianan. Ta suficiente motibo pa polis a haci un test di alcohol cu ne. E no por a ni supla. E tabata chupa e pipa di e ‘alco-sensor.’ A bay over mesora n’e proceso di detencion. Den un transporte policial a hib’e pa warda di polis caminda lo present’e dilanti un subfiscal, kende lo dicidi sea riba su encarcelacion of libertad.
