Idea di Baseball in Paradise a nace aña pasa, pa organisa e torneo aki, pero door di pandemia di Covid-19, a pospone esaki.
Shurty Tremus, organisado di e torneo, a conta cu februari e aña aki el a bin Aruba pa wak kico tabata posibel, pa asina entre su persona y tur e contactonan cu e tin na Aruba, logra organisa Baseball In Paradise. Esaki ta un torneo cu lo tuma luga for di dia 4 te cu 9 di october y lo tuma luga den tur stadion di Aruba.
Lo tin 30 team en total, den e siguiente categoria: U12, U14, U16 y U18, cu lo participa den e torneo aki. Tremus tin un total di ocho team cu ta bin for di Hulanda pa bin hunga Aruba. Varios ekipo di Corsou y Bonaire tambe lo bin Aruba. Algun ekipo a cancela nan participacion door di Covid-19, pero a confirma nan participacion pa otro aña caba.
Ya caba nan tin planes pa trece un sorto di All Star Game, pero Tremus no tabata kier a divulga mucho informacion. Loke si el a bisa cu tin varios scout interesa pa bin Aruba cual ta haci e torneo aki mas grandi di loke e mes a spera den cuminsamento.
Por ultimo, Tremus a haci un invitacion pa e pueblo di Aruba, pa dia 4 di october, cu ta e Grand Opening den Joe Laveist Ballpark. E dia aki nan ta cuminsa c’un clincia gratis pa tur mucha di entre 8 cu 12 aña, cu no por participa den e torneo, sigui pa un wega di softball entre tur e coachnan cu ta participa den e torneo pa nan forma un bond entre nan tur. Na final di dia lo tin e prome wega mes di e torneo Baseball in Paradise.
Pa cobertura mas amplio lesa edicion di TREMPAN mañan.
