Recientemente e banda di rock “Aletheia” a haci su debut participando na Battle of the Bands 2026 na Centro di Bario Noord. Cu un energia pegahoso, Anna van Houdt (vocalista), Raygell Koolman (guitarista), Loghan Steenvoorde (bajista), Dane Kock (drummer) y Alakina Gonzalez Lujan (vocalista y guitarista) a duna un show di rock inolvidabel.
Despues di 5 luna di training intensivo, Aletheia ta satisfecho cu nan presentacion. Nan a logra duna un show completo pa cual nan a traha duro p’e y di cual nan ta hopi orguyoso. Subi riba un escenario pa prome biaha como banda no ta facil. E ta rekeri di bon dominio di bos, instrumento y claro un bon dosis di entretenimento.
Riba escenario Aletheia a conecta cu e publico y a ricibi un acogida grandi pa medio di aplauso, grito y bulamento riba e tononan energetico di nan musica. E dinamismo di Aletheia a subi mas ainda ora nan a presenta nan cantica original “Tuning out”; un cantica reflexionando riba e diferente etapanan di un relacion amoroso sin rumbo. Hopi hende por a identifica cu e cantica aki y a demostra esaki gritando emocionalmente durante y na final di e cantica.
Aletheia ta gradici e publico cu tabata presente pa nan tremendo apoyo. Na mes momento Aletheia ta manda un palabra di pabien pa tur banda cu a participa e anochi ey; esta Monotone pa e bunita presentacion y na e ganadonan di e evento; esta Santanero y Red Rush. Y abo kier conecta cu Aletheia? Sigui nan via nan pagina di Instagram.
