Aunke cu no ta un celebracion oficial na Aruba, tin varios famia, cu tin custumbernan Mericano y/of Canades, ta celebra Thanksgiving. Esaki ta inicio di e temporada di fiesta cu ta bin. Pero ta bon pa conta e storia di con Thanksgiving a cuminsa y con el a bin haya e nomber aki, Dia di Accion di Gracia, manera ta yam’e na Spaño.
E dia aki no ta wordo celebra solamente na Merca, pero tin varios otro pais cu a adopt’e specialmente mirando e migrantenan Mericano cu tin na Centro America y Israel, como tambe na Brasil, algun isla di Caribe y hasta Liberia.
Na Merca, e tradicion moderno di e dia aki, ta origina desde aña 1623, den un celebracion na Plymouth, den e actual estado di Massachusetts. Tambe ta existi evidencia cu e exploradonan Spaño na Texas a realisa celebracionnan riba e continente prome cu aña 1598 caba y fiestanan di gradicimento den colonia di Virginia. A celebra e fiesta na aña 1621 como gradicimento pa un bon cosecha. Den e añanan despues, e tradicion a continua cu e lidernan civil, manera e gobernador William Bradford, cu a planea pa celebra e dia y yuda na 1623.
Macy’s Parade
Anualmente e cadena di tienda Macy’s, ta realisa un gran desfile den e cayanan di Manhattan, na New York, cu ta atrae miyones di persona riba Broadway Avenue pa mira e blaasnan gigante y presencia e actuacion di artistanan musical invita, turista y habitantenan local di e ciudad, ta disfruta e desfile financia pa Gobierno y empresanan priva.
Despues di Thanksgiving kico
Manera cu Thanksgiving yega, mayoria negoshi ta habri for di mainta super tempran. Esey ta e diabierna siguiente di e fiesta tradicional, cu ta apertura di e temporada di compras di Pasco. Riba e dia aki, conoci como Black Friday, tiendanan ta ofrece prijsnan rebaha y hopi cliente ta acudi for di e prome oranan di dia na e diferente centronan comercial pa por probecha di e miho ofertanan. Na Aruba poco poco e tradicion aki tambe ta drentando mas y mas, specialmente e aspecto comercial den cual tiendanan ta ofrece prijsnan cu descuento pa un solo dia.
