Pa PAR formashon i edukashon ta áreanan klave na momento ku ta traha pa alkansá prosperidat di un Pais. Pa e motibu aki nos ta realisá proyektonan manera kolekshon di material pa skol pa mucha i hóben ku ta aportá na e trayekto di formashon i edukashon. Durante temporada di fakansi miembronan por a pasa i hasi entrega di material pa skol.
PAR ta konsiente ku formashon i edukashon ta é kaminda pa krea un base pa desaroyo duradero. Hubentut di awe ta e lider i trahadónan di mayan. Edukashon ta fortifiká hendenan su kapasidat pa pensa krítikamente, tuma desishonnan informá, i partisipá aktivamente den prosesonan laboral, empresarial, komunitario i polítiko. Den un komunidat ku ta konsistí di individuonan kritiko i informá, por logra avansenan efektivo.
Den kuadro di esaki a bira un kustumber, ku e último 6 añanan, tur komienso di aña eskolar, huntu ku miembronan di PAR, ta hasi un donashon di material pa skol. E aña aki partido a skohe e skolnan Pedro Luis Brion School i Scholen Gemeenschap Otrobanda (De Springplank) pa risibí e materialnan aki. Duna e materialnan dirèkt na skol no solamente ta aportá na un kousa práktiko, pero e ta fungi komo símbolo di apoyo i speransa, pa e hóben, maestro i mayor.
Skol ta mas ku un lugá di enseñansa; e ta un lugá kaminda mucha i hóben ta krese, forma nan identidat i kuminsá traha riba futuro. Direktiva di PAR i frakshon di PAR kier gradisí tur miembro i simpatisante di Partido Alternativa Real ku a kontribuí ku e bunita i importante proyekto aki. PAR ta deseá tur alumno, mayor, dosente i personal no dosente un aña eskolar eksitoso, yená ku goso i positivismo. Ban pa un aña eskolar briante!
