Un biaha mas Fundacion Lisette Gomes y Fundacion Mi Voz ta bo Voz tey pa asina duna un man den yuda un mama cu su dos yiunan chikito cu ta pasando den pobresa extremo.
Lisette Gomez, representando ambos fundacion, a splica cu normalmente nan no ta saca casonan zomaar. Pero ora cosnan ta den crisis of cu a bay fo’i man, ta dicidi pa divulga esaki na comunidad, cu tin pobresa eyfo y cu mester di ayudo.
Den e caso aki, e mama, cu su yiunan di 2 y 8 aña no tin cuminda. E fundacionnan riba nan mes ta analisa e situacionnan manera esaki. Nan ta haci un background check, ta tuma contacto cu esnan cu a tuma contacto cu e mama, den diferente area, sea ta social of otro.
Hunto cu e trahado social di e fundacionnan, a saca afo cu e mama y su yiunan ta den crisis. Ta pidiendo cuminda. E mama ta pendiente pa haya un cas na FCCA. E ta durando un poco largo. Ta di compronde cu tin un proceso, pero ta yega un momento cu e ta bira desesperante pasobra e vivienda cu nan ta aden no ta apto pa biba aden. Ta un situacion hopi dificil cu diferente instancia ta na altura di dje.
Awor aki ta pidiendo cuminda, cosnan basico, na prome luga cuminda cayente. Pero den futuro mester pidi un biaha mas ayudo di comunidad, por ehempel pa e cas cu e lo haya, cu e no tin nada. Ya ta hayando si reaccion. Gomes ta contento con comunidad a reacciona. Nan no por imagina cu un mama ta pasando den un situacion asina cu su yiuna, vooral na Aruba. Pero esaki ta un realidad.
Lisette Gomes a pone un post riba Facebook cu a habri wowo di hopi hende. Pa nan mes e situacion ta fastioso pa nan. Hendenan tin biaha no ta haya sa di casonan cu nan ta yuda. Internamente tin hende aki aya ta haci donacion. Tin un grupo cu ta manda un WhatsApp cu mester di cierto cosnan. Pero ta yega un momento cu ta dal para y no a den nan man mas pa haya un cas. E ora ta pone e realidad eyfo pa hendenan haya sa cu tin situacionnan malo na Aruba, cu su caso ta hopi urgente y tin mester di ayudo mas pronto posibel.
Pa loke ta e mama mes, bida a pone cu e ta pasando den duro. El a conta cu e tin basta problema, pero no di awo. El a acerca trahadonan social. Ya ta andando pa un aña prome cu nan a wordo yuda. E ta un mama soltera, hunto cu su yiunan. E so mester paga tur cos y no ta di awo el a pidi pa un cas na FCCA. Ta basta tempo e tin cu el a entrega peticion na FCCA. Ya ta 11 aña caba.
Kico ta e peticion
Loke mas e mama ta anhela, ta un dak pa e por hinca su yiunan. E ta dependiendo riba hende y no por sigui asina. E kier pa tin nan propio cas, pa e tin nan privacidad, pa e por biba trankil. E tin famia si, pero caminda pa keda e no tin. Su famianan ta yuda den loke e por. E muchanan ta bon di salud. E grandi si ta sufri un tiki di asma, pero por lo general nan ta bon di salud.
FCCA
Tur ora nan ta bis’e cu e wachtlijst ta largo, aunke cu e ta spoed. E mama tin un trabao y e por maneha cierto cosnan, pero no tur cos. E mama ta pidi pa FCCA pa e haya e cas pa caba y tambe cuminda pa nan por come, esey por tuma contacto cu fundacion Lisette Gomes, y e lo percura pa e mama y su dos yiunan haya cuminda.
