Den conferencia di prensa diamars mainta, director di AZV, Edwin Jacobs a elabora riba e cifranan obteni den e prome seis luna di 2022 y un poco di loke por bay spera e di dos mita di aña. E ehecutivo di e seguro general di malesa a indica cu ta mira un desaroyo positivo pa loke ta trata e entrada di e fondo. Asina mes, tin otro factor cu ta traha den contra, por ehempel, cu ainda no a recorta lo suficiente y cu no tin mucha entrada na prima.
Tur esaki ta mustra cu, maske gobierno a duna instruccion pa su contribucion ta cero, lo mester aporta un 12.5 miyon florin na e caha di AZV.“Nos ta premira cu e fondo ta bay aumenta cu 3.1% compara cu loke a presupuesta. Primordialmente pa motibo di BAZV y door di e recuperacion economico di turismo cu ta bayendo hopi mas lihe cu den e prome proyeccionnan a indica nos” Jacobs a bisa admitiendo cu pa loke ta trata primanan, si esey no ta e caso.
“Ta bay tin un saldo positivo di 0.4 miyon florin, pero e BAZV tin potencial pa crece mas depende con e crecemento economico continua e proximo lunanan nos dilanti.”
Basa riba esey, director di AZV a enfoca riba e parti caminda mester percura pa pidi recibo ora di cumpra pa sigura cu e BAZV ta yega na e fondo. “Un biaha mas mi kier haci e apelacion, manera a indica na bosonan, importante pa e fondo ta e entrada y BAZV ta un fuente hopi i mportante.” El a bisa di sa e sectornan caminda tin evasion di impuesto relatando con den fin di siman e tabata den bario di Noord, den dos diferente supermercado, y mester a atende nan paso nan ta elimina benta for di e mashin. Consecuentemente ta cobra e consumidor e BAZV, pero door cu ta elimin’e y no registr’e den e mashin, AZV no ta ricibi e sumanan aki.
Pa e relato completo, lesa TREMPAN
