Tin un problema serio cu e autonan confisca. E garage di Polis na Balashi ta yen di autonan y brommernan confisca. Autonan y brommer confisca sea pa un crimen of falta di documento.
Esey ta pone cu hasta pafo di garage di polis ta poniendo auto. Na otro wardanan na Shaba y Santa Cruz tambe ta yen di auto confisca. Mayoria auto tin algun luna of aña eyden. A bay asina leu cu a cuminsa stiwa autonan riba otro pa por hinca mas auto confisca. E ta un situacion hopi fastioso pa autoridad por traha. Ultimanente na varios occasion a tuma nota cu no mag di confisca auto mas pa falta di espacio pa para auto den cura. Autonan sin seguro, sin number paga etc mester keda riba caya pasobra no por confisca esaki. Tin Polis cu ta insisti y otronan cu ta prefera di laga e autonan gewoon cu nan chauffeur riba caminda.
Ta duna e multa y cla. Otro autonan ta envolvi diariamente den accidente y nan no tin seguro of chauffeur no tin rijbewijs. Hasta e autonan aki varios biaha ta keda riba caya. Esey ta nifica cu e peliger ta keda riba caminda cu autonan sin seguro, sin belasting paga y chauffeurnan sin rijbewijs cu e vehiculo. Ta algo cu mester haci trabou di dje y urgente. Mientras cu e autonan aki ta para sea habri of kibra den cura, tin e otro problemanan cu nan ta causa. Ora awa cay bisiñanan a keha masha hopi mes di e criaderonan cu e autonan aki ta causa cu awa ta acumula den nan. Tin Polisnan cu parce a traha full un plan pero nada ta wordo haci. Parce du mando Policial tambe ta manera sordo y ciego pa e problema di e autonan. Un hende mester tuma e decision y manda destrui e autonan cu tin basta tempo para den e wardanan.
Den pasado ta basta auto a wordo hiba pa wordo destrui y a bira hero bieu cu a wordo transporta pa exterior. Esey nifica cu e mesun trabou aki mester tuma lugar y asina Polis tin espacio pa por sigui kita e cantidad di autonan y brommernan riba caminda cu no tin seguro of no tin number paga. Si e superiornan scucha un tiki mas di nan soldatnan riba caya, nan lo realiza cu e situacion ta basta serio. E fotonan aki ta ilustra con serio e situacion ta den garage di Polis na Balashi entre otro. Con autonan confisca ta djis wordo poni riba otro y brommernan tambe para na cantidad den e cura.
