Awe ta un dia special di e donantenan di sanger. Awe ta Dia internacional di donante di sanger. Bloedbank ta haci nan esfuerso pa haya donante pasobra bo sanger ta salba bida di otro hende.
Raymond Maxwell ta vocero di banco di sanger na Aruba. Bloedbank no ta para keto riba un dia manera awe.
Bloedbank ta celebra esaki den gran forma. Maxwell ta tuma e oportunidad pa gradici tur donante cu ta duna diariamente sanger pa por yuda cumpli cu e demanda cu tin cu hospital. Na hospital tur dia sanger ta wordo uza y si no ta pa nan, bloedbank no por duna sanger.
Tambe a tuma e oportunidad pa inspira mas hende pa duna sanger. Esaki ta haci’e den un forma di opendag cu a wordo atendi na un bon manera. Tambe algun siman atras tabata tin yen di hende ta cana rond cu capa cora. Durante e Aruba Bank walk and run, riba Linear Park, hasta den supermercado por a ripara esey y bloedbank ta contento cu nan a haci esey. Awe a kibra e silencio. E hendenan aki ta superhero. Nan ta dunado di sanger y pa bo ta un superhero, bo no mester haci algo extra ordinario. Birando un donante di sanger, bo ta superhero. Bloedbank mester di bo sanger. Imagina ora tin accidente, riba cama di operacion, den oncologia, caminda tin e pashentnan cu cancer, na e departmento dialyse, damanan den parto. Sanger ta wordo uza tur dia y Bloedbank ta masha grandido cu su donantenan cu ta compromete nan mes pa asina nan yuda e puebo di Aruba den necesidad di sanger.
Scarsedad di sanger
World Health Organization ta puntra 5% di e poblacion. Pa Aruba esey ta cay rond di 4000 donante y tin 1833 donante. E gap ta hopi grandi ainda pa cera. Ta pesey ta haci un apelacion riba e pueblo general di Aruba, pa por bira donante di sanger, pa asina aki tambe por cumpli cu e demanda eynan.
Un donor mester bin normalmente 1 biaha pa aña. Awor aki e ta bin 3 pa 4 biaha pa aña. Aki ta mira cu e donor druk ta subi. Ta hopi importante pa bira donante di sanger. Y sin sanger, ta perde pashent.
Con facil
Ta hopi facil pa bira donor. Por yama y por presenta. Bo mester ta bon di salud y ora cu yega na Bloedbank, ta yena un formulario cu pregunta y for di eseynan e proceso ta cuminsa. E ta tarda 4 luna. E prome dos lunanan ta warda, despues ta yama e donor pa haci un checkeo medico. Despues ta bolbe warda dos luna. E espacio entre e lunanan ta pa incubatietijd cu si bo tin algo por gar’e. Pesey e cuater lunanan.
Un trend mundial
Scarsedad di sanger ta un trend mundial. E focus di hende mundialmente ta tur caminda, aunke bahando riba yuda bo prohimo. E ta global. Na Aruba ta purba di haci esaki na un manera creativo pa por toch inspira y haya mas donante. Ta pesey a cuminsa cu e accion di capa cora. Nan tabata tur caminda riba Aruba y awor aki ta kibra silencio.
Pa mas informacion con ta bira un donor
Por yama Banco di Sanger 5870002 of yama hospital y pidi extension di Bloedbank y cu gusto e personal amabel di e Banco di Sanger ta duna tur informacion cu bo tin mester pa bo bira un donor.
