Diahuebs durante dia a tuma luga un encuentro publico den Parlamento, caminda cu Prome Minister a trata e Onderlinge Regeling, cual tema sigur a lanta basta stof cerca oposicion.
Onderlinge Regeling ta un acuerdo cu gobierno di Aruba lo bay firma cu Hulanda dia cuater di april venidero, loke lo regla e organo cu ta bay controla e medidanan cu a bin cu ne of cu a acorda cu Hulanda riba dje, cu lo pone riba lomba di pueblo, cual t’e simpel realidad.
mr. Gerlien Croes, miembro di fraccion di AVP, a sigui comenta cu aworaki gobierno ta bin bisa cu no tin un rijkswet mas, cu awo el a bira un Onderlinge Regeling, gobierno tin mas di bisa ora di yega na decision ora cu tin cu tuma riba e areglo aki.
E punto ta cu pueblo no ta hungando ningun rol y no a hunga ningun rol desde prome dia cu gobierno a tuma e decision riba su mes pa bay Hulanda y tuma decision di medida cu e lo bin cu ne pa su pueblo.
N’e momento aki nan ta papia di e rol di parlamento di Aruba cu aworaki parlamento tambe por controla ora cu mester bin cu ley, ta nan tin cu aprob’e. Pinta bunita e situacion pero den practica ta full diferente.
Un ehempel simpel ta cu Parlamento y pueblo di Aruba ningun dia tabata kier of desea pa bin un recorte den AZV, unda cu awe pashent y comunidad di Aruba mester paga pa nan remedi. Ainda tin dokter cu ta pidi pa haya bek loke a kita fo’i nan. Parlamento no tabatin na ningun momento algo di bisa ora cu gobierno a bay Hulanda, firma, haci y deshaci y bin cu medida riba lomba di pueblo.
Basta cu prome minister a bisa cu esey no tabata parti di landspakket. Esey tabata dia 15 di mei ora cu tabata para cu lomba contra muraya.
Na final di dia, loke cu a bin bisa ta cu gobierno ta keda duna su mes mas poder pa acorda decision cu Hulanda sin tin e participacion di pueblo, sin tin e participacion di parlamento cu ta representante di comunidad y esey t’e realidad cu ta biba aden p’e proximo cuater añanan, pasobra lo bay firma un acuerdo cu Hulanda pa cuater aña, los di e acuerdo di landspakket.
