Tur caminda cu nos yega den fin di aña ta tende e mesun noticia tristo cu hopi hende ta bandonando Aruba pa motibo di e situacion penoso cu Gabinete Wever-Croes ta creando.
Den esaki tin un cantidad grandi di profesional, yiunan di tera, cu ta bandonando Aruba pa e maltrato cu nan ta hayando, e lider di fraccion di AVP, mr. Mike Eman a expresa cu un preocupacion grandi. Eman ta papia di un “braindrain” cu ta tumando lugar den nos Pais. E braindrain aki tin diferente causa:
Maltrato di e profesionalnan. Tanto den compensacion como den trato. E casonan di profesionalnan cu ta bandona Aruba pa e motibo aki ta masha hopi mes. Den mundo medico (dokter y enfermera), ingeniero, arcitecto, maestronan di school y den comercio en general tin hopi caso di yiunan di tera cu ta bandonando Aruba pa bay Hulanda, Boneiro of Corsou. E cortamento den presupuesto y e leynan (Norminkomen Topinkomen) cu ta mara of reduci salario di e profesionalnan ta demoralisa e profesionalnan. E “tricledown” effect di e medidanan aki ta demoralisa esunnan den otro schaal den structura di e companianan y institutonan tambe.
Persecucion y demoralisa di e profesionalnan. Hopi ta e casonan di persecusion politico of cu ta pone “friends & family” riba hende capacita pa favorece nan sin cu nan tin e preparacion pa e funcion.
Ta kita e profesionalnan pa pone compinchi pa tapa e cosnan cu no ta cuadra. Hasta ta paga profesionalnan cu “golden handshake” cu condicion cu nan no mag di papia pa sigura cu nan lo bay keto.
Aña ta bay habri cu mas medida cu ta haci cu costo di bida lo aumenta mas ainda. lo sigui kibra e poder di compra di e empresarionan tambe severamente. No solamente e aumento di BBO, pero e medidanan contra di director/accionista di empresanan chikito y mediano (salario ficticio) tambe ta bayi tin concecuencia funesto den 2023. Hopi ta papia di cera compania y bandona Aruba.
Lider di fraccion di AVP mr. Mike Eman ta bisa cu p’esey ta crucial pa den 2023 bin cu cambio. Aruba no por perde mas profesional, pueblo no por sigui sufri asina.
