Diaranson mainta Corte a clausura e prome parti di tratamento di e caso Avestrus. Awor ta bay cuminsa e parti di exigencia di castigo, pa cual tin dos dia reserva. Den oranan di mainta ex-Minister Benny Sevinger, ex-miembro di Management Team di DIP Franklin Abath y e hotelero Ewald Biemans, tabata presente den Corte pa atende cu nan caso.
A cuminsa cu e parti di Biemans, unda e hotelero a splica e procedura cu el a haci pa pidi extencion di tereno pa su hotel, den cual no tabatin nada straño den dje. Solamente loke a resalta den e caso e mainta aki tabata cu Franklin Abath, for di 1987, tabata brinda servicio na su compania hotelero. E tabata traha taxatie rapport tanto pa e hotel, pa cas di Biemans y tabata yud’e tambe den sector di real estate. Esaki, Abath a bisa hues, no a kita nada di e obhetividad cu cual e mester a haci su trabou pa DIP. “Mi consenshi ta limpi den esey.”
Despues cu a finalisa cu e parti di tereno otorga na e compania hotelero di Bucuti, a trata e ultimo parti di e acusacion contra Sevinger, cu ta malversacion di un suma di 11 mil florin for di e fundacion Curason Berde. “Mi no a malversa pasobra ami no por a firma den nomber di e fundacion y e placa cu nan a paga mi tabata di mi. Ta huur cu nan tabata debe pa uzo di mi edificio y recibo di awa cu ami tabata paga ora cu e fundacion no tabatin placa”, asina e parlamentario a splica hues durante tratamento di e caso.
Diahuebs y diabierna ta sigui cu e parti rekisitorio di Ministerio Publico. Pa relato mas amplio, lesa e siguiente edicion di TREMPAN.
