Diamars anochi a tuma luga un reunion entre un comision cu ta representa e clubnan di futbol y cu AVB, riba peticionnan di e clubnan mes. Na final di e reunion a haya un reaccion di e presidente di AVB, Randolf Lacle kende a comenta un poco riba e reunion. Lacle a comenta cu e reunion a bay den bon ambiente. Mirando cu tur wega di futbol na Aruba ta para, e clubnan a dicidi di yama un reunion cu AVB. AVB di su banda hunto cu directiva a splica claramente nan punto di bista. A splica kico nan a haci caba, kico ta e plan y kico tin pensa di sigui haci. Lacle di su banda a acepta cu AVB a faya di no duna suficiente informacion tannto n’e clubnan como n’e pueblo pa cual a crea espacio pa trece hopi pregunta y preocupacionnan incesario.
Ta haci nan maximo esfuerso pa keda cla cu e refereenan p’asina futbol por continua. A aclaria hopi punto y lo sigui traha den un tempo corto p’asina futbol por continua. Locual lo pasa awo, ta bay bek na directiva pa djey sinta cu e refereenan y asina yega na un solucion mutuo pa bala por cuminsa lora un biaha mas. Riba e puntonan cu e refereenan a presenta, AVB no a bay ni acuerdo y tampoco descorda. Pues, lo mira bek riba e reglamento di ordo y wak con por yega na otro. AVB di su banda, tambe ta lamenta e situacion di e referee Bedoya. A duna dos bes biniticuater ora pa AVB soluciona e problema. Lacle a vocifera cu ta premira cu prome cu e cuarentiocho ora yega, ya lo tin un solucion.
AVB ta cla pa sinta cu e refereenan p’asina sigui cu futbol. Lacle na ningun momento a sinti su funcion na peliger, manera e clubnan a vocira. E ta algo normal, mirando cu semper lo tin hende cu no lo ta contento cu su perona, pero ta traha duro pa sigui hiba futbol padilanti. Riba e situacion di biahamento. A vocifera cu mientras tin problema na cas, Lacle tabata den exterior. E biahe tabata plania caba, pues no t’asina cu ora e situacion a pasa, cu ta e momento ey a core book pasashi. Ta como un luna pasa FIFA a manda pasashi p’e presidente atende e conferencia importante pa cu futbol.
