Diaranson den oranan di despues di merdia a sosode un accidente na Savaneta. Esaki a pasa na momento cu chauffeur di autobus B-113 a hay’e ta hala un banda debi cu un otro auto a crusa dilanti dje. Consecuentemente e bus a dal contra un cura di cas.
Polis a presenta na e sitio pa tuma over e datonan di e accidente aki. Di biaha a pidi presencia di ambulance, pa motibo cu e chauffeur di autobus tabata keha di dolor. Rapid responder a presenta na e sitio pa brinda asistencia medico. Door di e impacto di e accidente e chauffeur a ricibi kap na su cabes.
E autobus a ricibi daño material na banda di pasahero. Polis a cuminsa cu nan investigacion pa haya sa con duro e tabata bin.
