Un rato pasa pa 2:45am a sosode un accidente na altura di Sabana Berde, entre Brandweer y Aeropuerto. Un peaton, cu a caba di participa den parada di Flambeu, obviamente mal burachi, tabata cana zig zag riba caminda. Un auto a kita p’e pero esun su tras no por a desvia y a dal’e cu su spiel di auto. E peaton a cay y a resulta herida.
E impacto tabata asina fuerte cu e peaton, alcansa un poco despues di Price Mart, a bay cay te na otro banda di caminda, net na altura di Garage Centraal, pero riba e caminda grandi. E auto cu a alcans’e ta un Nissan Cube, RHD, color blauw, cu number A-51018. E chauffeur di e auto a bisa cu el a topa cu e peaton su dilanti y no por a haci nada mas. El a dal’e cu e spiel na banda di chauffeur, debi cu den caso di RHD, e chauffeur ta sinta na e otro banda.
Polis a pidi presencia di ambulance cu a trata e pashent na e sitio mes, stabilis’e, pa despues transport’e pa Dr. Horacio E. Oduber Hospitaal pa un revision medico mas avansa. Polis di trafico ta investiga e desgracia, aunke varios automobilista a para pa testigua cu ta for di un bon pida a nota e peaton canando zig zag memey di caminda, riba un pleno “highway”, anto pa colmo bisti tur na preto.
