Awe ta celebra e 210 añanan di Independencia di Colombia y pa esaki Asociacion Amigos de Colombia (Asocol) a bini hunto na e Plaza de Agradecimiento. A hisa bandera Colombiano y a haci un ofrenda floral pa conmemora e dia special aki.
E asociacion no por a tene nan celebracion cu ta haci tur aña, pero a dicidi di no laga e dia pasa. Segun Moises Fernandez, Presidente di Asocol, no por haci ni un tiki celebracion. No lo por a haci eventonan grandi pa respeta protocol. Na e conmemoracion aki solamente e directiva tabata presente y ningun invitado mas, pasobra e situacion no ta permiti.
Tin otro actividadnan organisa cu no a respeta e distanciamento social, pero e directiva a tuma e decision di respeta protocol y no organisa un actividad cu lo compromete salud di su hendenan. E asociacion ta haci uzo di e celebracion di Colombia pa nan recauda fondo. Fernandez no ta kere cu e fondo lo hustifica loke ta implica e contagio di e personanan durante e epoca ki. En principio no tin mucho pa celebra, pasobra e situacion na Colombia ta hopi delicado y na e momentonan aki e celebracion no ta na su luga.
Moises Fernandez a felicita tur Colombiano riba e dia special aki, pa nan tur pasa e dia den famia y trankil. Tambe pa celebra e union na cas, pa apoya tur hende na Colombia y esunnan aki na Aruba. Pa mantene distancia social pa evita contagio di e pandemia.
TOCANTE COLOMBIA
Colombia ta situa den e parti nort di Sur America; Na e parti nort e ta na frontera cu lama Caribe, na nortwest e tin frontera cu Panama, na parti zuid e tin frontera cu Ecuador y Peru, na parti oost e tin frontera cu Venezuela, na e parti zuidoost e tin frontera cu Brazil y parti west cu ocean Pacifico. E ta consisti di 32 departamento y cu capital Bogota, e ciudad mas grandi di e pais. E pais ta midi 1,141,748 kilometer cuadra, e ta e di 4 pais mas grandi di Sur America despues di Brazil, Argentina y Peru. E ta e di 25 pais mas grandi na mundo cu mas di 50 miyon habitante y considera e di tres economia mas fuerte di e continente Sur Americano.
