24ora.com a ricibi varios keho di doñonan di apartamento y/of edificio pa loke ta pagonan di recibo di awa. Pa e motibo aki mes a acerca Asja Dongen, vocero di WEB Aruba NV, pa asina haya un adelanto pa loke ta e comportacion di pago di comunidad.
El a splica cu e comportacion di pago ta bayendo mas miho. Si bay bek den tempo, pa loke ta e pandemia, for di februari di e aña aki, no a desconecta ningun hende. Esey tabata na prome instante pa motibo di e sistema di facturacion nobo cu a haci.
Net despues e periodo di coronavirus a drenta y a stop tur desconexion. Sinembargo segun tempo ta pasando, tin casi cinco luna caba den e periodo di crisis, ta yega un momento cu WEB no por sigui. Menos entrada e haya, cu e no por cumpli cu su propio debenan financiero y riba termino largo ta haya cu no por garantisa produccion y suministro tampoco.
A warda te mas of menos 15 di juni, cu a cuminsa informa clientenan cu awo si ta birando importante pa cuminsa paga atrobe. E ora a facilita e sistema di areglo di pago y a urgi un y tur pa cera un areglo di pago, si no por cumpli cu full cuenta cu tin habri. Na juli a cuminsa atrobe pa desconecta.
Prome cu a cuminsa desconecta, a manda carta pa cada cliente pa informa nan cu nan tin sumanan habri y tambe cuanto e sumanan ta. Na cuminsamento e tabata un tiki slow, pero awor aki tin cu bisa cu e entradanan a cuminsa a cuminsa subi atrobe. Hendenan ta pagando nan cuentanan.
Tin hasta tambe cu ta pagando, pero nan ta pagando via online banking. E ora ey ta hopi importante pa bo menciona bo number di percela. Si no menciona number di parcela, WEB NV no por procesa e placa cu ta drenta, no sa riba cua cuenta tin cu boek esaki.
Esey ta e complicacionnan cu tin. Pero mester bisa cu e entradanan ta subiendo.
Aumento den areglo di pago
Segun Dongen, comunidad a reacciona masalmente riba areglo di pago. Na por a haci esaki via e website di WEB NV. A hasta facilita e formulario online, cu no mester a bin WEB specificamente pa esey.
Pueblo a reacciona y hopi hende a cera nan areglo di pago. Pero lamentablemente tin cu bisa si, cu tin algun si cu a cera e areglo, pero toch no ta cumpliendo cu e terminonan di pago.
Den e caso ey tambe a haya ta desconecta e meter di awa.
Keho
Dongen a agrega cu propietarionan di apartamento of casnan di huur, mester regla cu e persona cu ta den nan propiedad. E ta keda co-responsabel pa e debenan cu t’ey.
WEB a haya keho, pero asina e sistema ta hinca den otro. P’esey tambe ta hopi recomendabel pa e doñonan, pa regla esey ora nan cera contractnan di huur. Stipula pa e ta inclusive of no. Dongen no ta experto riba e tereno ey, pero ta bon pa ta consciente di esey si.
Esey sigur ta un conseho pa esnan cu ta huur nan propiedad. Manera ta stipula den condicionnan di WEB ora un hende cu ta huur un apartamento of un edificio, e doño di e edificio semper mester yena un apoderacion caminda cu e ta aproba y determina cu e no tin ningun obhecion pa e hende cu ta huur habri un meter di awa pa e edificio ey.
Prome cu firma e ta hopi recomendabel pa regla esey cu e persona cu ta huur bo e edificio.
Ultimo palabra
E situacion ta fastioso, e ta complica. E ta genera miedo cerca un y tur. Di parti di WEB Aruba, ta haci tur lo posibel pa ora cu bin WEB, cu bo ta haya bo den un ambiente cu ta sigur. P’esey tambe ta tene cuenta cu e distancia fisico, ta pidi tur hende pa bisti nan mondkap. No ta admiti mucha, laga nan na cas, no expone nan. Tambe ora cu bin WEB ta atende solamente un persona pa cada servicio.
Tur esey ta medidanan cu ta tuma pa salvaguardia e salud di nan mes y di nan clientenan. Na final pa full Aruba.
Servicionan di WEB
Tambe Dongen a agrega cu ta pidi pa pronto keda pendiente pa un servicio nobo cu WEB tin. Awor aki ora desconecta meter di awa pa motibo cu tin cuentanan habri, e ora ey tin cu paga un gasto di reconexion di 50 florin. Esey, te awor aki mester pasa personalmente na WEB pa pag’e. Ta bay bin cambio den esey pa facilita e reconexion. Ta bay introduci un sistema di Whatsapp caminda cu por paga e suma cu tin habri y upload e prueba d pago via e number di Whatsapp.
E ora e gastonan di reconexion, ta bay riba e siguiente cuenta di awa. Tur esey ta cosnan cu WEB ta haci pa facilita e servicio y tambe e reconexion. Esey ta un di e adaptacionnan cu WEB ta haci. Awor aki, pa conexion nobo di awa, no tin mester di bin WEB. Por haci tur cos online.
