Minister Plenipotenciario Ady Thijsen, a duna un bista kico ta e plannan cu e fondonan di EU. E mandatario a splica cu tin diferente proyecto andando. Un di nan ta esun di E-government cu Aruba a haya cu sosten di Union Europeo. Otro proyectonan cu Aruba a haya ta uno cu colaboracion entre Universidad di Aruba y Universidad di Leuven, e mandatario a bisa durante un entrevista cu e team di 24 Ora na Hulanda.
Esaki ta proyecto cu ta habri porta pa Aruba pa otro cos importante tambe. Segun Thijsen, loke Aruba ta haciendo na Brussel y Den Haag ta hopi importante y p’e motibo aki e relacion cu e municipio- y provincianan mester ta bon. Aruba ta bay papia awo tambe cu e institutonan manera MKB (Midden en Kleinbedrijf) y nan koepelorgaan RVO (Rijksdienst voor Ondernemend Nederland). Esaki ta caminda cu por cana pa yuda cu e desaroyo di Aruba.
Riba e pregunta si e madatario sa con Aruba ta para riba e posibel colaboracion entre Hulanda y Aruba pa yuda studiante haya stageplek, Ady Thijsen a contesta cu mester palabra cos bon ya cu minister di enseñansa, Endy Croes y e minister di enseñansa di Hulanda, a reuni den e Vierlandenoverleg cu a tuma luga recien na Aruba y a bisa publicamente cu Hulanda lo bay sostene Aruba den loke t’e tratadonan.
Esaki ta algo bon paso e kier brinda nos studiantenan e miho servicio cu Arubahuis por duna pa yuda nan ya cu e situacion no ta facil na Hulanda. Ni p’e Hulandesnan mes tin luga pa nan si kier papia di e huisvestingsbeleid y esaki ta loke ta trahando riba dje. Y p’e motibo aki tambe ta drentando e municipionan pa wak kico por logra.
Pa duna un ehempel, Thijsen ta splica cu na Leeuwarden y Groningen Arubahuis a haya bon conseho y nan ta dispuesto pa yuda Aruba tambe. E scolnan ta concentra hopi tambe riba e uitwisseling di studiantenan. E scolnan kier pa nos muchanan ta eynan y pa nan studiantenan tambe por bay Aruba pa un intercambio. Esaki por tuma luga riba tereno di Turismo pero tambe di Gezondheidszorg riba nivel di MBO, HBO y tambe WO si mester.
Minister Thijsen ta positivo pa futuro
Ady Thijsen a bisa di ta bay mas leu ainda. El a splica cu e tin dos funcion: e ta representante di Union Europeo y e ta Minister Plenipotenciario cual ambos funcion e ta haci cu mil amor. Thijsen ta conciente cu hende ta hinca esaki den contexto politico y ta bisa cu e ta gana dos salario y ta haya yen di beneficio pero esaki no ta berdad. E ta haci esaki paso e sa e situacion di su pais y e ta contento cu nan a dun’e e confiansa aki. Hunto cu e team di Arubahuis e ta sigur nan lo bay haci un bon trabou pa pone Aruba bek manera e mester ta.
