Prome minister Evelyn Wever-Croes tabata orador invita na un conferencia na Den Haag, Hulanda, “Shaping the Feminist Foreign Policy,” unda cu el a splica cu e maneho di relacion exterior semper ta influencia pa locual ta sosode n’e otro paisnan cu Reino ta deal cu ne.
“Nos kier contribui pa logra igualdad pa tur. Ta enfoca principalmente riba e derecho y representacion di hende muhe, e comunidad LGTBQ+ y e gruponan marginalisa. Pasobra nos sa pasobra tin un caminda hopi largo pa cana. Pa nos Reino, e Feminist Foreign Policy, ta riba aumenta nos ambicion pa igualdad en general. Igualdad pa hende muhe, e comunidad LGTBQ+ y e gruponan marginalisa specificamente.
Tur hende ta beneficia di igualdad di genero. Ta p’esey ta tuma un otro direccion. Aña pasa na Aruba a presenta e prome Gender Policy, hunto cu diferente stakeholder y cu sosten di UN Women. Cu e Gender Policy aki, Aruba ta boga pa habilita un ambiente caminda igualdad di genero y empoderamento di hende muhe den tur sector y sociedad ta bira posibel.
E label feminista a yuda den hopi sentido. Sinembargo tin biaha tambe e ta yega na tension. Pero mas parti e ta aumenta e atencion pa loke e ta para pe,” ta loke e prome minister a bisa den su discurso na Den Haag.
Fuera di e tema aki, e prome minister a accentua riba e conflicto cu tin entre Israel y Palestina y su consecuencianan.
Presente na e conferencia aki tabata varios embahador di diferente pais na mundo, caminda posicion di hende muhe ta afecta. Durante e conferencia a toca e tema di hende muhe den conflicto y den guera, pais cu tin mentalidad di machista y otro minoria cu tambe ta sinti e discrminacion. “E prome dia di conferencia a bay hopi bon. Mi ta sumamente orguyoso di por a representa Reino, pero principalmente Aruba, riba un topico asina importante” Prome Minister a expresa.
MARCHA PRO FAMIA Y DIVERSITY WALK
Den un contraste cu e discurso teni p’e Prome Minister na Den Haag, ya for di siman pasa caba e union di pastoor cristian a organisa un Marcha Pro Famia, cu lo sali for di Citgo Boulevard pa 5’or di awe tardi, cu ta totalmente opuesto na loke e prome minister a para p’e den su discurso na Den Haag.
Ainda nos por corda den un prome instante, no mucho tempo pasa, cu e mesun prome minister aki, conhuntamente cu varios otro minister di su gabinete, sin conta algun parlamentario, ta totalmente en contra di matrimonio di e mesun sexo, un bista cla cu definitivamente no tin igualdad di genero, esey specificamente e comunidad LGBTQ+. Esaki ta un muestra contrario di loke e minister ta para p’e.
Di un otro banda su siguiente dia tin e Diversity Walk, caminda cu e comunidad LGBTQ+ ta tene su evento, saliendo for di Plaza Niki Habibe pa 5:00 pm direccion Plaza Daniel Leo, caminda cu nan ta marcha pa sostene e diversidad den nan comunidad. Esaki ta un evento organisa pa Fundacion Orguyo.
Mirando e dos marchanan aki, un hende por confundi pasobra un rato ta mustra cu e minister ta contra derechonan di e comunidad LGBTQ+ y despues den su discurso ta mustra cu SI e ta para pa e comunidad aki, loke ta trece un aire di confusion pa comunidad.
Si den comunidad internacional e prome minister ta para pa tur clase di igualdad cu por tin, e mester para p’e na cas tambe. Pero por lo general, ta elogia e bon trabao cu e Prome Minister a haci riba escenario internacional, dunando un bista di loke empoderamento femenino tin den un pais chikito, manera esun di nos.
