Imsan tin un servicio sumamente importante diariamente y tin biaha e ta wordo lubida. Nos ta papiando aki di Dialyse.
Dr. Joel Rajnherc, director di e instituto, a splica e departamento aki ta un di e speerpunten diario di tratamento di nos malesanan cronico na Imsan. Esey ta e vision cu Imsan tin cu nan lo ta e centro di tratamento di malesanan cronico. Tin 18 stoel, luga pa 18 pashent. Pero ta trahando den dos shift. Esey ta nifica cu mainta e prome shift tin aproximadamente 18 pashent y despues di merdia atrobe 18 pashent.
No tur e stoelnan por wordo uza semper na e mesun momento. Esey ta un problema. Pasobra si tabata tin un pashent cu un infeccion, no por uza e mesun mashin, e mesun stoel, riba e mesun momento atrobe. Si bo tin un capacidad pa 36 stoel, of 36 hende pa dia, eigenlijk semper bo ta aproximadamente un 10% bao di bo maximo cu efectivamente bo ta uza.
Na e momento aki ta yegando riba e limite ey caba. Problema ta cu e pashentnan terminal, nierinsuficientie, cu mester bay riba dialyse na Aruba, ainda ta aumentando. No a yega na su maximo ainda. E tratamento cu hospital Horacio Oduber ta dunando y Imsan ta brindando, ta di un calidad masha halto mes. Hopi pashent ta wordo trata y ta sobrevivi den un bon calidad di bida, tempo largo y mas largo cu ta spera y cu ta den e mesun ramo di expectativa di bida, manera cu ta haya na tur centro mayor na mundo.
Kiermen cu tin mas pashent nobo cu ta yega y e pashentnan cu nan tin, ta sobrevivi mas largo. Esey ta nifica cu e demanda pa mas stoel pa tratamento ta aumentando.
Con bo por aumenta e capacidad
Un lo ta pone mas stoel. Traha un edificio nobo, pone mas enfermera. Un otro manera ta pa pone un tercer shift. Esey ta algo cu ta den discusion.
Riba tereno di dialyse, ta e modelo di cooperacion cu ta wak cu mester bin na Aruba entre Imsan y dr. Horacio Oduber Hospital. E nefrologonan ta traha hunto tremendamente.
E departamentonan ta trahando tremendamente bon cu otro. Ora cu un pashent tin cu bay den exterior, tur hende ta yuda. Kiermen cu esaki ta un modelo con cooperacion entre dos instituto mester bay. Rajnherc ta hopi orguyoso di wak con su coleganan ta funciona hunto y con e calidad di servicio ta cu nan ta brindando di tur dos banda. Pero cu e capacidad ta yegando, cu por brinda awo ta sigur. Mester amplia e capacidad ey.
Cuanto pashent
Actualmente e cantidad di pashent ta aproximadamente 65, cu ta haya tratamento cada tres dia. E cantidad di dialyse cu ta haci pa aña ta sobrepasa caba 10 mil. Ta hopi pashent tin cu haya dialyse. Ta haya pashentnan di afo. Turistanan cu ta bin Aruba, kier sigui cu nan tratamento. Hopi biaha ta haya contacto cu nan specialista di antemano caba, pa sa kico nan problemanan ta y ta wak con por fit nan den un schedule pa toch laga nos turistanan bin Aruba. Hopi di nan tin un di dos cas na Aruba, ta biba parcialmente na Aruba y hunto cu e specialistanan di HOH, Imsan ta haci un programa con por acomoda mayoria di nan.
E servicio
Tin mas servicio di Dialyse. Con cu bay bin, e demanda toch ta hopi pa e servicio aki. Segun dr. Rajnherc, pa loke e tin di compronde, hospital tin 21 stoel di dialyse. Esey ta dialyse cronico. No ta papiando aki di esunnan agudo riba intensive care. Hunto nan tin mas of menos 40 stoel. Ainda esey no ta suficiente capacidad pa Aruba so y ni pa turismo, dr. Rajnherc a enfatisa.
