Dia 24 di juni lo tuma luga e di dos clasificatorio di Best of the Best. Un atleta mester participa den e campeonato aki pa bringa den Best of the Best.
Alberto Klaber a splica cu Best of the Best ta e evento mas prestigioso cu tin actualmente. Varios atleta di exterior lo bin Aruba pa asina participa den esaki. Ta formando e mihonan di Aruba pa por enfrenta e team internacional. Esaki ta haci cu den e pre-eventonan lo tin referee internacional cu lo bin for di Merca y tambe lo tin un representante di sistema electronico. Aruba ta e prome pais na mundo cu a proba e sistema electronico y awo ta enfoca riba e Generation III. Ta premira cu lo estrena esaki den e Best of the Best dia 7 di october proximo.
Klaber a sigui bisa cu pa tur hende biaha bay afo ta dificil y p’esey ta trece otro atletanan Aruba, pa asina engrandece e taekwondo di Aruba tambe pa asina tur hende di Aruba ta haya un feeling di kico tin den exterior ora cu nan bay. Den e ultimo campeonato tabatin video replay, tur cos a cana bon.
Pa dia 24 di juni, Dia di San Juan, lo tin mas participante di Club Estrella y tambe di Noord Taekwondo Center. Ambos club a crece den nan cantidad di participante y nan tambe kier participa den e Best of the Best.
