No obstante cu Gobierno di Republica Bolivariana de Venezuela a anuncia reapertura di frontera cu Aruba, parce cu aki Gobierno di Aruba no ta sperando riba e anuncio. Por lo menos ta parce cu Aruba awor lo prefera di wanta nos frontera cu Venezuela cera.
Un di e retonan grandi ta e cantidad di Venezolanonan cu ta yega Aruba pa pidi asilo. Awor cu legalmente a keda demostra cu si no tin vuelo directo, no por pidi pa asilo, net awo kier habri fronteranan bek. Esey lo nifica cu tur Venezolano cu yega riba un vuelo of den boto na frontera, pidi pa asilo, mester acepta e peticion. Pa warda riba un contesta di Gobierno, e peticionario por biba y traha na Aruba trankilamente.
Abogado mr. David Kock tabata cla pa entama un caso sumario contra Gobierno di Aruba y di Hulanda pa pidi beneficio pa e grupo aki. Nan kier alohamiento, cuminda, cuido medico, scol pa e muchanan y placa si nan no por haya trabou. A opta pa wanta e caso sumario ora Gobierno a core laga e Venezolanonan den libertad. Esey mesora a kita e grado di urgencia pa un caso sumario, pero e abogado a keda di sigui e proceso legal via Corte di LAR.
Riba e pagina di Facebook di Gobierno a anuncia merdia cu ainda no a drenta un notificacion oficial di Gobierno Venezolano e asunto di habri frontera atrobe. Gobierno di Aruba a laga sa publicamente cu habrimento di frontera awor aki no ta oportuno!
