Aruba Offroad Foundation ta anuncia cu Fundacion Parke Nacional Arikok a confirma un reunion pa dia 18 di Juni pa sinta na mesa y explora diferente solucion pa e situacion di ATV cu UTV den parke.
Aruba Offroad Foundation ta pidi gobierno di Aruba pa e Ministernan responsabel riba e tema aki especialmente Minister Marisol Lopez Tromp pa ta presente durante e reunion aki pa por actua como mediador imparcial y por facilita un combersacion cu e meta di pone riba mesa diferente solucion pa cuida naturalesa y na mesun tempo por salvaguardia e pan di mas di 600 famianan cu ta relaciona na e actividad recreativo aki.
Aruba Offroad Foundation ta hopi positivo cu a acepta pa sinta cu nos y ta spera cu e lista di recomendacion cu ta bai presenta na Parke ta haya atencion y consideracion necesario pa hunto yega na solucion sostenibel y balansa entre economia, naturalesa y famianan.
Pa finalisa Aruba Offroad Foundation kier gradici e apoyo di tur stakeholders y pueblo cu ta compronde e situacion duru aki cu actualmente nos tin nos dilanti. No solamente pa via di COVID pero pa nos economia door di restriccionan pisa imponi cu ta bai stroba nos futuro recuperacion y bienestar di mas di 600 famia.
