Sea nan mesun departamento di siguridad mester “step up to the plate” of lo mester haci uzo di inteligencia y acesoria priva pa sostene banconan local den un esfuerso pa proteha nan clientenan di criminalnan profesional cu ta “target” Aruba den asunto di skimming di carchinan di banco. No ta prome biaha cu banconan di Aruba ta bira victima di e practica aki. E problema no ta cu nan ta purba, sino cu nan ta logra pasobra a tarda demasiado prome cu siguridad di banco a descubri cu nan ta birando victima di skimming den nan mesun mashinnan di ATM.
No ta prome biaha
Den pasado, gruponan procedente for di e mesun area asina, a yega di horta riba 200 mil florin na Aruba, door di e mesun sorto di practica asina. Locual nan ta haci ta, instala un aparato chikito cu casi bo no ta mir’e mes, cu ta graba tur informacion di bo carchi y otro cu ta saca potret y video di bo cuater numbernan secreto di bo cuenta. Asina nan ta core traha un carchi nobo, cu aparatonan cu a trece Aruba y ta bay banco manera nad’un pasa pa lanta placa di bo cuenta, comosifuera ta di nan mes e cuenta ta. Y asina nan ta check e balans cu tin riba e cuenta y ta keda lanta te ora cu nan logra laga e cuenta bashi.
Suspension na banco
E acto criminal aki no a bay sin consecuencia na por lo menos un banco local. Ey un miembro di siguridad, aunke no tabata capas di descubri e skimming ni por a haci nada pa fren’e of pa yuda polis pa gara e ladronnan, a haya ta bon di bay manda un voicenote den su grupo di amigo y famia pa informa nan di un “secreto di banco”, haciendo cu tur hende a cuminsa bay den panico. Parce cu a suspend’e mesora di su trabou y a cuminsa un proceso disciplinario contra dje cu hasta lo por cost’e su trabou. Pa mas informacion y detaye lesa TREMPAN di awe.
