Aruba Dolphins ta un club di landamento cu ta existi pa varios aña y nan tin hopi atleta. E biaha aki seis atleta di Aruba Dolphins ta scogi pa forma parti dje seleccion di landamento cu lo representa Aruba otro luna den e competencia di Carifta Games 2022. E club ta sigui prepara su atletanan duro pa cualkier competencia di landamento.
Ynocente Chacon, Head coach di Aruba Dolphins Club, a bisa cu nan ta trahando duro cu tur mucha di e club. E club aki ta consisti di 80 landado, cual 44 ta mucha homber y 36 mucha muhe. Nan ta preparando pa nan competencia na comienso di april, cu ta e Stingray Challenge XIV na Piscina Olimpico Roly Bislik. Esaki ta un competencia masha importante mes y eynan e muchanan ta haya nan preparacion pa fin di otro luna p’e Carifta Games.
Cuarentiseis aña pasa a funda Aruba Dolphins y e tempo aya e muchanan tabata landa den lama banda di Commandeurs. E ta gradici na Roly Bislik, kende a landa di Punto Fijo pa Aruba, pa haci un esfuerso pa tin e pool unda awendia e muchanan ta landa. E ta recorda cu antes tabata haci yen competencia manera Centro Americano y Carifta aki na Aruba.
Chacon ta invita e mayornan cu kier join e club. E club ta duna les apart di training di dialuna pa diasabra. Dialuna y diaranson nan tin e orario di 4:30 pm pa 6:00 pm, diamars y diahuebs ta di 5:00 pm pa 6:30 pm. Diabierna ta di 5:30 pm pa 7:00 pm y diasabra di 7:00 pa 8:00 am.
Pa lesa mas lesa TREMPAN.COM.
