E organisacion independiente di conservacion di naturalesa conoci como Fundacion Parke Nacional Aruba (FPNA) ta uza e ocasion mundial di Dia di Mama Tera pa revela su transformacion pa Aruba Conservation Foundation (ACF). E transformacion akinan ta encera un nomber nobo, un logo, y identidad visual nobo cu ta alinea na e direccion strategico di e organisacion como un organisacion moderno di maneho di conservacion y alabes ta alinea na e necesidad actual pa conserva naturalesa di Aruba. Asina, e organisacion ta despedi di ta un organisacion tradicional di maneho di parke cu hopi a bin ta conoce pa mas cu 20 aña.
Den e ultimo 7 aña, e fundacion a experiencia un expansion di su rol y su responsabilidadnan banda di maneha Parke Nacional Arikok, como cu e tabata apunta pa maneha varios area protegi adicional rond di Aruba. Na aña 2017, e area di mangel y saliña RAMSAR site #198 Spaans Lagoon tabata añadi na e responsabilidad di e fundacion, y den aña 2019, Parke Marino, cu ta consisti di cuater area marino protegi, oficialmente tabata apunta bou e maneho di e organisacion.
Den 2020, 11 area terrestrial adicional a bin pa wordo maneha cu ta inclui e areanan manera Duinen Sasarawichi, Saliña Malmok, Rooi Lamunchi y Costa Sero Colorado pa djis menciona algun. Adicionalmente, e fundacion ta participa activamente den e esfuersonan di conservacion cu ta inclui colaboracion cu varios NGO local y internacional p’e programanan manera conservacion di Shoco, restauracion di mangel y coral, reintroduccion di e ‘Lora’ cu ta un especie endemico y extinto na Aruba, maneho di e especienan invasivo, y educacion den comunidad di Aruba, specialmente pa e muchanan di scol. Pa miho maneha e trabounan cu ta keda bira mas amplio y pa mitiga e presion creciente riba naturalesa, e fundacion a pasa door di un procesion strategico integral di 2020 pa 2022 pa asina determina su direccion nobo pa e proximo añanan.
Cu esey, den 2023, Aruba Conservation Foundation a introduci su Multi Annual Corporate Strategy 2023 – 2032 cu ta marca e organisacion su prome mapa strategico cu ta responde na retonan nobo ecologico, social y economico, y ta representa e organisacion su compromiso cu conservacion, cu un enfasis riba sostenibilidad, biodiversidad, mehoracion di sistema ecologico y iniciativanan di restauracion. E cambio aki ta significa e transicion di un organisacion tradicional di maneho di parke pa un organisacion moderno di maneho di conservacion, asina enfatisando e necesidad pa conservacion di naturalesa pa un futuro sostenibel.
E cara nobo
E transformacion di e fundacion tawata necesario pa alinea na e direccion strategico nobo y e accionnan di conservacion di ACF pa asina cambia e percepcion y imagen di un organisacion tradicional di maneho di parke cu solamente ta opera dentro di frontera di parke y cu ta enfoca solamente riba recreacion. Asina a adopta su direccion nobo como un organisacion moderno di maneho di conservacion cu e ta awo. Dialuna ACF a reconfirma su posicion como Aruba su bos pa naturalesa cu e organisacion actuando y bogando pa proteccion, preservacion, y restauracion di e isla su sistema ecologico y biodiversidad, recordando e local- y bishitantenan di nan conexion cu naturalesa.
E nomber
E nomber “Aruba Conservation Foundation” a ser scogi pa capsula ACF su actividadnan amplio, paso di berdad, naturalesa no ta conoce frontera. E inclusion di “Aruba” ta crea un sensacion di orguyo, asina reflehando e compromiso di e organisacion na e isla cu e ta sirbi y tambe indica geograficamente e localidad di e fundacion.
Cu e transicion di e organisacion, a bira vital pa e transicion tambe tabata mira den e nomber nobo. E palabra “Conservation” ta duna significacion na e organisacion su compromiso pa conserva Aruba su herencia natural y cultural awo cu e organisacion ta maneha casi 25% di e isla su area terrestrial y 0.2% di e isla su awanan teritorial.
Por ultimo, tawata imperativo pa inclui e palabra “Foundation” pa asina pone enfasis riba e status di e organisacion como uno independiente y un entidad legal reconoci, pa asina e no wordo confundi mas cu un departamento di gobierno.
E logo y identidad visual
E logo nobo ta refleha forsa y complehidad mientras e ta encarna e cadushi iconico, un especie cu por wordo mira riba casi henter e isla y tambe e combinacion di elementonan di naturalesa manera olanan di lama y liñanan circular cu ta representa awa. E logo ta diseña pa refleha ACF su compromiso na Aruba y su hendenan y ta simbolisa union y accion colectivo. Na e centro di e logo tin e silueta di un solo troncon di cadushi, cu ta duna honor na e resiliencia di e isla y su hendenan.
Inspira door di Aruba su sistema ecologico y biodiversidad abundante y diverso, e colornan nobo ta captura e vibrancia y rikesa di e isla su flora y fauna. E colornan ta refleha locual ta haya den mondi, saliña, lama y area di costa manera e Cododo, e Barica Hel, e Gutu y e Shoshoro di Aruba, tur esaki ta djis pa nombra algun.
“Ta un honor absoluto pa por revela e nomber nobo, Aruba Conservation Foundation (ACF) y su identidad visual nobo cu e comunidad di Aruba”, Tyson Lopez, CEO, Aruba Conservation Foundation, ta comenta. “E cambio aki no solamente ta significa e transformacion visual di nos organisacion pa un organisacion moderno di conservacion di naturalesa sino tambe ta reafirma nos compromiso na innovacion como un organisacion cu ta pone naturalesa na prome luga. Mi ta sumamente orguyoso di nos team pa nan pasion, dedicacion y creatividad durante henter e proceso transformativo aki y mi tin tur confiansa cu e cara nobo lo uni y inspira e comunidad pa adopta e direccion nobo y bay dilanti hunto pa naturalesa.”
Pa descubri mas di Aruba Conservation Foundation, por fabor bishita www.acf.aw of bishita Facebook, Instagram, of LinkedIn. Pa conecta cu e team, e-mail [email protected].
