Durante e fin di siman di 19 pa 21 di augustus ultimo, piloto di Aruba saca cara y a sali den premiacion den e careda di karting cu a tuma luga riba un parkeerplaats na Waaigat. A converti e parkeerplaats di Waaigat den Punda pa un pista di karting. Curacao International Karting Club t’e organisacion cu a organisa e careda aki. Ya tin dos edicion caba pa aña 2022, ta sperando por lo menos dos edicion mas prome cu aña cera.
Compara cu Aruba, na Corsou su karting ta avansando y e organisadonan tin hopi smaak y dedicacion pa sigura cu karting ta sigui crece na Corsou. Un di e teamnan mas grandi na e momentonan aki ta Fireball Team di cual Matthew Paesch, di Aruba, ta forma parti di dje. Segun cu a compronde, na Corsou ta trahando duro pa traha nan propio pista di karting. Durante e fin di siman di careda, a conta cu mas di sesenta piloto. Jarzinho Pita ta un di e top piloto di Corsou cu a yeg’i bataya fuerte den careda grandi na Colombia. Paesch tabata compaña tambe pa algun persona di Aruba, esta Gregory Tromp kende ta un di e tecniconan grandi di karting na Aruba.
Resultado di categoria shifter
Prome luga: Matthew Paesch (Aruba)
Di dos luga: Jarzinho Pita (Corsou)
Di tres luga: Christopher Arends (Aruba)
December proximo lo tuma luga un evento grandi di karting na Colombia. Rok Cup Colombia ta organisa e evento di Pan American 2022 na Villavicencio, Colombia riba 8 te cu 11 di december 2022. Por spera cobertura un biaha mas di 24ora.com durante e fin di siman di careda aki na Colombia.
