Aruba Ports Authority tin motibo pa celebra cu pueblo di Aruba. A logra otro record den 2018 ricibiendo mas cu 815 mil turista cu a pasa algun ora riba e isla durante nan biahe riba crucero. Cifranan ta indica cu e cantidad di barconan cu a yega Aruba tabata mas cu e 352-nan cu a trece 792.403 pasahero crucero den 2017.
E diferencia ta sinta den e hecho cu algun di e barconan cu Aruba a ricibi den 2018 tabata mas grandi y cu mas pasahero. Den 2018 e lunanan cu mas barco crucero a yega Aruba tabata den januari, november y december unda cu tabatin 50 of mas calls di barco registra.
E aña’ki APA tabatin e honor di a trece pa Aruba un di e barconan mas grandi di mundo, cual tabata Freedom Of The Seas di RCCL y pa esaki APA mester a haci algun adaptacion na waf. E adaptacionnan aki ta sirbi pa den futuro sigui ricibi cruceronan grandi cu tur aña ta sigui crece den tamaño.
Cifranan preliminar, faltando e datonan di october, november y december, ta mustra cu e luna cu mas bishitante crucero a ricibi tabata na januari, cu 53 calls, cu 108.298 bishitante crucero, mientras cu e mesun luna di 2017 tabata 89.734 bishitante, cu ta mustra un aumento di casi 19 mil, sin conta e cantidad di miembronan di tripulacion.
E cifranan aki ta stimula APA pa sigui traha pa mehora e calidad di producto Aruba y e waf en particular pa ricibi bishitantenan cu ta gusta biaha via di crucero. E cifranan aki ta demostra cu tur e esfuerso haci den promocion y principalmente atendencia di reunion di companianan di barconan crucero ta dunando na fruta.
APA ta invita pueblo di Aruba pa compaña nan den despedida di un exitoso 2018 ora cu awe dialuna pa 11:45am lo cende un pagara di 1 miyon tiro.
