Diasabra mainta miles di persona incluyendo varios di Aruba a participa den e Tropical Run di 5 kilometer na Miami. E ruta a cuminsa for di Watson Island y a caba na Miami Beach. E promer persona cu a yega e ‘finish line’ a logra core esaki den apenas 15 minuut. 24ora.com tabata presente y por a mira varios Arubiano cu a participa. Nos a logra di entrevista algun di nan pa asina tende con nan experiencia tabata na Miami.
Xyon Jacobs ta un hoben cu a participa pa promer biaha den un competencia di coremento den exterior. Den pasado e la participa den un triathlon na Bahamas. Pa Xyon e experiencia tabata uno positivo. E ta conta cu e subimento di e brug cu ta hibabo Miami Beach tabata un tiki pisa, pero apesar di esey tur cos a cana bon. E la sali di dos lugar den su categoria di edad. Pa 3 seconde, e lo a sali na promer lugar. E lo desea di participa den futuro na Miami.
Dayron Solognier tambe a participa den e competencia. Aunke cu e sa core hopi mas liher cu awe, toch e ta contento di por a participa. Debi cu e tabata malo, e la logra di train solamente 1 siman.
Noelia van Rijn ta un di e otro hobenan cu tambe a participa. Na Aruba e la train bastante intensivo cu distancianan hasta mas largo cu 5km. E tambe a haya dificultad cu e brug. Locual cu mas e la gusta di Miami ta e centronan comercial.
Illiene Lopez kier a participa den e half marathon. Sinembargo no tabata tin mas lugar pa e participa y e ora a dicidi di participa den esun di 5km. Illiene a conta cu e gusta e race aki debi cu e orario ta uno cu bo ta sali trempan. Esaki ta evita cu bo ta haya e solo fuerte den bo cara mientras cu bo ta coriendo. E sport aki ta yudabo haya un estado di mente fuerte y tambe disciplina.
E hoben Leah Lejeuz tambe a sali ganador como # 1 den su categoria. Diadomingo 24ora.com lo sostene un entrevista cu ne.
Un pabien na tur e otro coredornan di Aruba cu a participa y a sali den premiacion. Keda pendiente pa e cobertura di e Miami Full & Half Marathon cu lo tuma lugar diadomingo mainta na Miami.
